ალეკო ელისაშვილი: ჩვენი არჩევანი არ არის სიბნელე და რუსეთი, ჩვენი არჩევანია ევროპა და პროგრესული, ცივილიზებული სამყაროს ნაწილად ყოფნა

„გუშინდელმა დღემ ჩემზე იმდენად დიდი შთაბეჭდილება დატოვა, რომ დღესაც ვერ გამოვსულვარ ამ შთაბეჭდილებიდან. მადლობა თითოეულ მოქალაქეს, რომელიც მოვიდა. რა თქმა უნდა, სხვადასხვა პარტიის მხარდამჭერებიც იყვნენ, მაგრამ საერთო ჯამში, იყვნენ რიგითი ადამიანებიც, საჯარო მოხელეებიც, „ქართული ოცნების“ მხარდამჭერებიც, რომელთაც პირადად ვიცნობ“, - განაცხადა „მოქალაქეების“ ლიდერმა „ქრონიკის“ პირდაპირ ეთერში საუბრისას.

ალეკო ელისაშვილის თქმით, ახლა საუბარია სახელმწიფოებრივ და ისტორიულ ამოცანაზე.

„ეს დაინახა რუსეთმაც, ევროპამაც, საქართველოს ხელისუფლებამაც, რომელიც ბოლო დროს, ძალიან გაუგებარ პოლიტიკურ ზიგზაგებს აკეთებდა ევროპასთან დაკავშირებით. ყველამ უნდა იცოდეს, რომ არის საკითხები, რომლებშიც ყველა მტკიცედ ვართ. რა არის ეს სიმტკიცე? ეს არის ის, რომ ჩვენ გვინდა, ვიყოთ ევროპის ნაწილი არა მხოლოდ გეოგრაფიულად, არამედ -პოლიტიკურადაც“, - აღნიშნა ალეკო ელისაშვილმა.

მისივე თქმით, ევროპა არის სივრცე, რომლის ორგანული ნაწილი და შემქმნელი საქართველო ყოველთვის იყო.

„ეს ჩვენი ბუნებრივი არჩევანი, ბუნებრივი სივრცეა. ის, რომ მე-4 საუკუნეში ქრისტიანობა მივიღეთ, ეს იყო ჩვენი დიდი ევროპული არჩევანი, რადგან იქამდე, სხვა ძალა გვაძალებდა, რომ ზოროასტრიზმის მიმდევრები ვყოფილიყავით. ჩვენი არჩევანი იყო ქრისტიანობა. ჩვენი არჩევანი არ არის სიბნელე და რუსეთი, ჩვენი არჩევანია ევროპა და პროგრესული და ცივილიზებული სამყაროს ნაწილად ყოფნა. ეს ითქვა გუშინ და ეს ყველაზე ომახიანი განაცხადი იყო“, - აღნიშნა ალეკო ელისაშვილმა.

სამოქალაქო მოძრაობა „სირცხვილიას“ ორგანიზებით გუშინ თბილისსა და რეგიონებში აქცია, ლოზუნგით „შინ ევროპისკენ“ გაიმართა. მასში ასევე მონაწილეობდნენ ოპოზიციური პარტიების წარმომადგენლები და რიგითი მოქალაქეები. აქციის მიზანი იყო საქართველოს ევროპული მომავლის მხარდაჭერა. სამოქალაქო მოძრაობამ „სირცხვილია“ მომდევნო შეკრება 24 ივნისს დააანონსა. სწორედ ამ დღეს ცნობილი გახდება ევროპული საბჭოს გადაწყვეტილება საქართველოსთვის წევრობის კანდიდატის სტატუსის მინიჭებასთან დაკავშირებით.