გურამ მაჭარაშვილი: შეერთებული შტატების საელჩომ ქართულ საზოგადოებას პრაქტიკულად შეურაცხყოფა მიაყენა, როდესაც დემოკრატიული ღირებულებებისა და სამართლიანი არჩევნების თავისებური გაუკუღმართებული ვარიანტი შესთავაზა

შეერთებული შტატების საელჩომ ქართულ საზოგადოებას პრაქტიკულად შეურაცხყოფა მიაყენა, როდესაც დემოკრატიული ღირებულებებისა და სამართლიანი არჩევნების თავისებური გაუკუღმართებული ვარიანტი შესთავაზა, როდესაც უთხრა, რომ თუ არ იქნება არასამთავრობო ორგანიზაცია ისეთი, რომელიც გააყალბებს პარალელურ დათვლებს (და ეს არის საყოველთაოდ აღიარებული ფაქტი), შემდგომ თვენახევრის განმავლობაში ტყუილ ინფორმაციას არ მიაწოდებს საზოგადოებას (რაც თავად საელჩომაც იცოდა), მერე ეს ორგანიზაცია არ ჩაერთვება პოლიტიკურ პროცესებში და არ დაუდგება გვერდთ იმ რადიკალებს, რომლებიც ხალხის მიერ არჩეული ხელისუფლების წალეკვას ითხოვენ, ასეთი ორგანიზაცია სანდო არ არის, - ამის შესახებ მოძრაობა „ხალხის ძალის“ წევრმა, გურამ მაჭარაშვილმა განაცხადა.

„საელჩოსთვის სანდო მხოლოდ ის არასამთავრობო ორგანიზაციაა, რომელიც მისი შეხედულებით აყალბებს პარალელურ დათვლებს, ერევა პოლიტიკაში, იმ რადიკალების გვერდით დგას, ვინც ქართული საზოგადოების მიერ არჩეული ხელისუფლების წალეკვას აპირებს და, ბუნებრივია, რომ ქართული საზოგადოება ამ ყველაფერს არ მიიღებს, იმიტომ რომ ეს არ არის არც ამერიკული, არც ევროპული დემოკრატია და დემოკრატიული ღირებულებები. ჩვენ სწორედ ამას ვამბობდით, როდესაც გვქონდა კითხვის ნიშნები იმასთან დაკავშირებით, რომ ხომ არ ახალისებდა საელჩო იმ არასამთავრობო ორგანიზაციებს, რომლებიც პრაქტიკულად მიზანმიმართულად წარმართავდნენ პროცესებს, რომ უკანონოდ შეეცვალა ხელისუფლება. სამწუხაროდ, საელჩომ არამც თუ არ უარყო ეს, არამედ ყოველ ჯერზე ამტკიცებს, რომ ის ამ არასამთავრობო ორგანიზაციების უკან იდგა. აქედან გამომდინარე, ბუნებრივია, რომ ჩვენი ვალდებულება, რომ ხალხმა იცოდეს მეტი სიმართლე და ამ გამოწვევას მხოლოდ ხალხის ძალა უნდა დაუპირისპირდეს, არის აბსოლუტურად სწორი გადაწყვეტილება“, - განაცხადა მაჭარაშვილმა.

მოძრაობა „ხალხის ძალამ“ დღეს მორიგი განცხადება გამოაქვეყნა, რომელშიც აღნიშნულია, რომ „ისფედის“ გამოქომაგებით, საელჩო „ქართულ ოცნებას“ პირდაპირ ეუბნება, რომ რევოლუცია უნდა მოხდეს, „ნაციონალური მოძრაობა“ მეორე ფრონტის გასახსნელად ხელისუფლებაში უნდა დაბრუნდეს.