გივი მიქანაძე კეზერაშვილზე: თავდაცვის უწყებიდან მითვისებული თანხით ის ცდილობს დააფინანსოს რადიკალური ოპოზიცია და შემოიტანოს დესტაბილიზაცია ქვეყანაში

დაუნდობელი დაპირისპირება, რომელიც „ნაციონალური მოძრაობის“ წევრებს შორის გაჩაღდა, სწორედ ამ დაფინანსებიდან გამომდინარე, კიდევ ერთხელ ცხადყოფს, რომ ამ ადამიანებს ამ ქვეყნისა და ამ საზოგადოების მიმართ, არანაირი ინტერესი არა აქვთ, - ამის შესახებ საპარლამენტო უმრავლესობის წევრმა, გივი მიქანაძემ „ქრონიკასთან“ განაცხადა.

„მათი ერთადერთი ინტერესია ჰქონდეთ მუდმივი დაპირისპირება შავი ბუღალტერიიდან და ეს შავი ბუღალტერი არის კეზერაშვილის მიერ გაძარცვული საქართველოს თავდაცვის უწყება, ჩვენი საამაყო ჯარი, ეს მითვისებული თანხა მას გატანილი აქვს ქვეყნიდან და სწორედ ამ თანხით ცდილობს დააფინანსოს რადიკალური ოპოზიცია და შემოიტანოს დესტაბილიზაცია ქვეყანაში“, - განაცხადა მიქანაძემ.

„ნაციონალურ მოძრაობაში“ დაპირისპირება და ბრძოლა გავლენის მოსაპოვებლად გრძელდება. რა როლი აქვს ამ პროცესში დავით კეზერაშვილს - კვლავ მთავარ კითხვად რჩება. ამ კითხვას პასუხი ნაწილობრივ ლევან ხაბეიშვილმა უკვე გასცა. ერთ-ერთ გამოცემასთან ინტერვიუში მან დაადასტურა, რომ გარკვეულ აქტივობებს და ზოგიერთ ოპოზიციონერს სწორედ კეზერაშვილი აფინანსებს. „ქართული ოცნებისთვის“ თავდაცვის ყოფილი მინისტრის ფინანსები ქართულ პოლიტიკაში შავ ფულს ნიშნავს.