მამუკა მდინარაძე: პატივი ვეცით მოწოდებებს და დეოლიგარქიზაციის კანონპროექტი გადავაგზავნეთ ვენეციის კომისიაში, ერთი თხოვნა დავამატეთ, რომ თუ შეიძლება მალე გაიცეს სამართლებრივი შეფასება

როცა გავარკვიეთ, რომ უკრაინას დეოლიგარქიზაციის კანონი არ გაუწვევია, როგორც ვამბობდით და თან მოწოდებებსაც პატივი ვეცით, გადავაგზავნეთ ვენეციის კომისიაში და ერთი თხოვნა დავამატეთ, რომ თუ შეიძლება მალე გაიცეს სამართლებრივი შეფასება, - ამის შესახებ „ქართული ოცნების“ აღმასრულებელმა მდივანმა, მამუკა მდინარაძემ განაცხადა.

„მთელი წინა პერიოდი ვამბობდით, რომ ვერანაირ პრობლემას ვერ ვხედავთ ვენეციის კომისიაში კანონის გადაგზავნაში, რადგან ევროკომისიის პრეზიდენტმა, როდესაც არგუმენტები დაასახელა უკრაინის კანდიდატის სტატუსის მინიჭებასთან დაკავშირებით, ძალიან კარგი, უმაღლესი შეფასება მისცა უკრაინაში უკვე მიღებულ დეოლიგარქიზაციის კანონს, რომლის პირდაპირი თარგმანია ის, რაც ჩვენთან კანონპროექტის სახით დევს და ორი მოსმენით უკვე მიღებულია. ვერანაირ პრობლემას ვერ ვხედავთ სხვა ბევრი არგუმენტის გამოც, მაგრამ როდესაც ამ ყველაფერს დაემატა ის, რომ გაფართოების საკითხებში ევროკომისარმა გვთხოვა და მოგვიწოდა კანონპროექტის გაგზავნისკენ და შემდეგ ევროკავშირის ახალმა ელჩმაც იგივე გაიმეორა, როგორც პირადი კომუნიკაციის, ასევე საჯარო გამოსვლების დროს, ჩვენ ვთქვით, რომ გავარკვევთ რა ხდება, რადგან ურთიერთგამომრიცხავი ინფორმაციები ვრცელდებოდა. მას შემდეგ, რაც გავარკვიეთ, რომ უკრაინას დეოლიგარქიზაციის კანონი არ გაუწვევია, როგორც ვამბობდით და თან მოწოდებებსაც პატივი ვეცით, გადავაგზავნეთ ვენეციის კომისიაში და ერთი თხოვნა დავამატეთ, რომ თუ შეიძლება მალე გაიცეს სამართლებრივი შეფასება“,- აღნიშნა მდინარაძემ.

„ქართულმა ოცნებამ“ დეოლიგარქიზაციის შესახებ კანონპროექტის ვენეციის კომისიაში გაგზავნის გადაწყვეტილება მიიღო. ამ გადაწყვეტილებას საქართველოში ევროკავშირის წარმომადგენლობა გამოეხმაურა და პოზიტიურად შეაფასა.