დავით მათიკაშვილი: „ნაციონალური მოძრაობა“ და მათი პარტნიორები არ ერიდებიან არცერთ პროვოკაციას საკუთარი ვიწროპარტიული მიზნების განსახორციელებლად

„ნაციონალური მოძრაობის“ არსენალში ყოველთვის არის ისეთი ნაბიჯების გადადგმის სურვილი, რომ ქვეყანაში არეულობა გამოიწვიონ, რის საშუალებასაც ხელისუფლება მათ, რა თქმა უნდა, არ აძლევს, - ამის შესახებ საპარლამენტო უმრავლესობის წევრმა დავით მათიკაშვილმა „ხალხის ძალის“ მორიგი განცხადების კომენტირებისას განაცხადა.

„ნაციონალური მოძრაობა“ და მათი პარტნიორები არ ერიდებიან არცერთ პროვოკაციას საკუთარი ვიწროპარტიული მიზნების განსახორციელებლად. საზოგადოებისთვის კარგად არის ცნობილი, რომ რეალურად მიმდინარეობს პატიმარ სააკაშვილის პატიმრობიდან დახსნის სპეცოპერაცია“, - მიიჩნევს მათიკაშვილი.

საზოგადოებრივმა მოძრაობამ „ხალხის ძალა“ მორიგი განცხადება გაავრცელა, რომელშიც აღნიშნულია, რომ „მიხეილ სააკაშვილი პატრონებს ემუქრება, რომ 2008 წლის ომთან დაკავშირებით არა მხოლოდ ყველაფერს მოჰყვება, არამედ შესაბამის მტკიცებულებებსაც გაასაჯაროებს. იგივე ეხება რევოლუციის მოსაწყობად სააკაშვილის საქართველოში ჩამოყვანის სპეცოპერაციასაც, რაზეც ის პატრონებს ასევე მტკიცებულებების დადებით ემუქრება“.