AXIOS: აშშ-ის სენატი მომავალ კვირას რუსეთის წინააღმდეგ სანქციების კანონპროექტზე კენჭისყრისთვის ემზადება

აშშ-ის სენატი შესაძლოა უკვე მომავალ კვირას რუსეთის წინააღმდეგ სანქციების კანონპროექტზე კენჭისყრას შეუდგეს. ინფორმაციას AXIOS-ი ავრცელებს.

გამოცემა ინფორმირებულ წყაროებზე დაყრდნობით წერს, რომ „დემოკრატები“ „რესპუბლიკელ“ კოლეგებს აცნობებენ, რომ მზად არიან, მხარი დაუჭირონ ინიციატივას, რომელსაც აშშ-ის პრეზიდენტის დონალდ ტრამპის მოთხოვნით ირანთან დაკავშირებული დებულებებიც დაემატა.

კანონპროექტის მიღება შეიძლება, სენატში იშვიათ ორპარტიულ შეთანხმებად იქცეს იმ საკითხზე, რომელიც უკრაინაში ომის დასრულებისკენაა მიმართული. ბოლო თვეების განმავლობაში ზედა პალატაში პოლიტიკური დაპირისპირება დომინირებდა, წერს AXIOS-ი.

ამასთან, კენჭისყრა აჩვენებს, რომ სენატის უმრავლესობის ლიდერს, „რესპუბლიკელ“ ჯონ თუნსა და უმცირესობის ლიდერს, „დემოკრატ“ ჩაკ შუმერს არჩევნებამდე რამდენიმე კვირით ადრე თანამშრომლობა შეუძლიათ. ეს, შესაძლოა, გადამწყვეტი აღმოჩნდეს, რადგან სენატი მიმდინარე წელს მთავრობის საქმიანობის უკვე მესამე შესაძლო შეჩერების თავიდან აცილებას ცდილობს.

AXIOS-ი წერს, რომ სამშაბათს კაპიტოლიუმში სენატორ ლინდსი გრემის ხსოვნისადმი მიძღვნილი ცერემონია გაიმართება, რაც ემოციურ ფონს შექმნის იმ კანონპროექტის განხილვისთვის, რომლის მიღებასაც გრემი სიცოცხლის ბოლო დღეებში აქტიურად ცდილობდა.

„ოპტიმისტურად ვარ განწყობილი, რომ ძალიან მალე წინ წავალთ“, - განაცხადა სენატის საგარეო ურთიერთობათა კომიტეტის წამყვანმა „დემოკრატმა“ წევრმა ჯინ შაჰინმა.

მისი თქმით, უკრაინას ბრძოლის ველზე ინიციატივა აქვს, ხოლო კრემლის პოზიციები სულ უფრო მყიფე ხდება და სწრაფი მოქმედება სასიცოცხლოდ მნიშვნელოვანია.

კანონპროექტში, რომელსაც 60-ზე მეტი თანასპონსორი ჰყავს, 11 ივლისს ლინდსი გრემის მოულოდნელი გარდაცვალების შემდეგ უკვე ორჯერ შეიტანეს ცვლილებები.

პირველ რიგში, სენატორებმა მეორადი ტარიფების მაქსიმალური განაკვეთი 500%-დან 100%-მდე შეამცირეს და კანონპროექტის მოქმედების არეალიც შეავიწროვეს. ცვლილებების თანახმად, პრეზიდენტ ტრამპს მსგავსი ტარიფების დაწესება მაქსიმუმ ხუთი ქვეყნისთვის შეეძლება.

სენატორების ინფორმაციით, სიცოცხლის ბოლო დღეებში ლინდსი გრემმა შეძლო კანონპროექტისთვის ტრამპის ადმინისტრაციის მხარდაჭერის უზრუნველყოფაც.