ლევან მახაშვილი: მრავალი წელია, მოლდოვისგან განსხვავებით საქართველო, ნატოსთან ერთად, არა მარტო იღებს უსაფრთხოების სარგებელს, არამედ თავად შეაქვს მასში წვლილი

მრავალი წელია, მოლდოვისგან განსხვავებით საქართველო, ნატოსთან ერთად, არა მარტო იღებს უსაფრთხოების სარგებელს, არამედ თავად შეაქვს მასში წვლილი, - ამის შესახებ პარლამენტის თავმჯდომარის კაბინეტის უფროსმა, ლევან მახაშვილმა „ქრონიკაში“ ჩართვისას განაცხადა.

მან მოლდოვას ნეიტრალიტეტის სტატუსთან დაკავშირებით კომენტარი გააკეთა და განმარტა, ევროკომისიის ანგარიშში თუ რატომ აქვს მას საქართველოსთან შედარებით დაბალი ქულები მინიჭებული.

„საქართველო აქტიურად მონაწილეობს ევროკავშირის საგარეო და თავდაცვის მისიებში. ძალიან აქტიურადაა ჩართული ამ მიმართულებით და ეს არ არის ერთი წლის საქმიანობა. მრავალი წელია, საქართველო ნატოსთან ერთად არა მარტო იღებს ამ უსაფრთხოების სარგებელს, არამედ თავად შეაქვს წვლილი, განსხვავებით მოლდოვისგან. ამდენად, ასეთი კითხვები ჩნდება, თუმცა საბოლოო ჯამში, შეიძლება ერთი რამ ითქვას, რომ ყველა ქვეყანაში სხვადასხვა ტიპის ვითარებაა. გამორჩეულია თითოეული ქვეყანა. წლების განმავლობაში მოლდოვისთვის მაინც და მაინც ევროპული ინტეგრაცია არ იყო მისი ორიენტირი. ამ მიმართულებით მოლდოვა მხოლოდ და მხოლოდ ბოლო პერიოდში გააქტიურდა და სწორედ ეს არის შედეგი, რომ შედარებით დაბალი მაჩვენებლები აქვს. ერთი შემიძლია ვთქვა, რომ ნებისმიერი მიმართულებით, სახელმწიფო თუ ინდივიდუალურ დონეზე, მოლდოვასთან ყოველთვის ვაფიქსირებთ ჩვენს მზაობას, რათა ჩვენი საუკეთესო გამოცდილება გავუზიაროთ და მოლდოვამაც უკეთესი ქულები დააფიქსიროს“, - განაცხადა მახაშვილმა.

ევროკომისიამ ევროკავშირში გაწევრიანებაზე საქართველოს განაცხადთან დაკავშირებით ანალიტიკური ანგარიში გამოაქვეყნა.