ლევან მახაშვილი: ევროკომისიის ანგარიშში ცალსახად ჩანს, რომ საქართველოს ფუნდამენტურ მიმართულებებში აქვს წინსვლა

ევროკომისიის ანგარიშში ცალსახად ჩანს, რომ საქართველოს იმ ფუნდამენტური მიმართულებებით, რაც ევროკავშირის ინსტიტუციური და სამართლებრივი სისტემისთვის პრიორიტეტულია, აქვს წინსვლა,- ამის შესახებ პარლამენტის თავმჯდომარის კაბინეტის უფროსმა, ლევან მახაშვილმა „ქრონიკის“ პირდაპირ ეთერში ისაუბრა.

„ნამდვილად დადებითი ანგარიშია, რაც უპირველეს ყოვლისა ჩვენთვისაა ძალიან კარგი. ეს ანგარიში არის ყველაზე სანდო. ევროკომისია არის ერთადერთი ინსტიტუცია, რომელიც ამზადებს ასეთი ტიპის ანგარიშებს და ამ ანგარიშში ცალსახად ჩანს, რომ საქართველოს იმ ფუნდამენტური მიმართულებებით, რაც ევროკავშირის ინსტიტუციური და სამართლებრივი სისტემისთვის პრიორიტეტულია, აქვს წინსვლა. არ მინდა დავაკნინო სხვა მიმართულებებიც, რადგან სახლს რომ აშენებ ფუნდამენტთან ერთად კარ-ფანჯარაც მნიშვნელოვანია, მაგრამ ამ დოკუმენტში ჩანს, რომ საქართველოს საყრდენი ფუნდამენტი არის ძალიან კარგი. რა არის კონკრეტულად ეს მიმართულებები?! პირველი არის მართლმსაჯულება, საჯარო შესყიდვები, სტატისტიკა, ფინანსური კონტროლი და ა.შ. ამ ჯგუფში ცალსახად წინსვლაა და უკრაინასა და მოლდოვასთან შედარებით წინ ვართ.

მეორე მოთხოვნა ეს არის შიდა ბაზარი, რაზეც ფაქტობრივად დგას მთელი ევროკავშირი და ამიტომ შეიქმნა თავის დროზე ის. მთელი ამ მიმართულებებითაც საქართველო არის წინ და მესამე, ეს არის კონკურენტუნარიანობა. ამ დიდ საკითხებშიც საქართველო გამორჩეულია მის კოლეგა სახელმწიფოებთან შედარებით. საქართველოსთვის შედარებით ადრეულ ეტაპზე მყოფი სფეროები არის ე.წ. მწვანე დღის წესრიგი და რესურსების მიმართულება. ეს არის ის თემები, რაზეც საქართველოს უახლოეს მომავალში მოუწევს მუშაობა და ეს დოკუმენტი მაგიტომაცაა მნიშვნელოვანი სწორედ, რომ გარდა იმისა, რომ აჩვენებს იმას, თუ სად ვდგავართ, რა არის ჩვენი უპირატესობები და სად მივაღწიეთ წინსვლას, ამავე დროს გვაჩვენებს იმ მიმართულებებს, რაზეც უფრო მეტი სამუშაო გვექნება შემდგომ პერიოდში“, - აღნიშნა მახაშვილმა.

ევროკომისიამ ევროკავშირში გაწევრიანებაზე საქართველოს განაცხადთან დაკავშირებით ანალიტიკური ანგარიში გამოაქვეყნა.