ლევან მურუსიძე: წლების განმავლობაში ამერიკის შეერთებული შტატების დაფინანსებით ხდებოდა სასამართლოს დისკრედიტაცია და, შესაბამისად, საქმე მიდიოდა იმისკენ, რომ მომხდარიყო ამ სისტემის მიტაცება

იუსტიციის უმაღლესი საბჭოს მოსამართლე ლევან მურუსიძე აშშ-ს საელჩოს წარმომადგენლების მხრიდან ღია და პირდაპირი ჩარევის მაგალითებს იხსენებს. ამ თემაზე ლევან მურუსიძემ „იმედის კვირასთან“ ისაუბრა და აღნიშნა, რომ მისთვის და კიდევ 3 მოსამართლისთვის სანქციების დაწესების მიღმა ერთადერთი სურვილი დგას - დამოუკიდებელ სასამართლოზე გავლენის მოპოვება.

„როგორც პირდაპირ საუბრებში, ასევე შეხვედრებზე, სხვა საკითხებს რომ განვიხილავდით, ყოველთვის გვეუბნებოდნენ - ხომ არ დაფიქრდებოდით რომ სხვა პირები შეგეყვანათ იუსტიციის უმაღლეს საბჭოში? იუსტიციის უმაღლესი საბჭოს წევრები ირჩევიან ფარული კენჭისყრით, მოსამართლეთა კონფერენციის მიერ. ხალხი ფარული კენჭისყრით ირჩევს მთავრობას. ეს იგივეა, რომ ვინმემ მოუწოდოს ხალხს: „იცით რა, ხმა მიეცით არა იმას, ვინც გინდათ, არამედ იმას, ვინც ჩვენ გვინდა“, - ამბობს მურუსიძე.

მისი თქმით, როდესაც კონკრეტული მოსამართლეების კონკრეტულ პოზიციაზე განმწესების თაობაზე სტრატეგიული პარტნიორი ქვეყნის საელჩოს წარმომადგენლების მოთხოვნები არ დაკმაყოფილდა, დაიწყო უპრეცედენტო თავდასხმა მოსამართლეებზე. მრავალწლიანი პროცესის ავანგარდში კი სწორედ ის არასამთავრობო ორგანიზაციები იდგნენ, ვინც შეერთებული შტატებიდან კონკრეტული პროექტების ფარგლებში ფინანსდებოდნენ.

„წლების განმავლობაში ამერიკის შეერთებული შტატების დაფინანსებით ხდებოდა სასამართლოს დისკრედიტაცია და, შესაბამისად, [საქმე] მიდიოდა იმისკენ, რომ მომხდარიყო ამ სისტემის მიტაცება. ელჩი კონკრეტულ საქმეებზეც ლაპარაკობდა. როდესაც კონკრეტულ განაჩენს გამოიტანდა მოსამართლე, გამოვიდოდა ქალბატონი ელჩი და ბრძანებდა: „მე მიმაჩნია, რომ ეს განაჩენი არის უკანონო და დაუსაბუთებელი“, - აცხადებს მურუსიძე.

აშშ-ის სახელმწიფო მდივნის, ენტონი ბლინკენის განცხადებით, აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწესა.