გიორგი ვოლსკი: რაც წერია კონსტიტუციაში ჩვენს საგარეო კურსთან დაკავშირებით, არის უცვლელი და არა იმიტომ, რომ ვაშაძემ აქცია არ ჩაატაროს, არამედ იმიტომ, რომ ეს ჩვენს ქვეყანას სჭირდება

რაც წერია კონსტიტუციაში, ჩვენს საგარეო კურსთან დაკავშირებით, ეს არის უცვლელი, - ამის შესახებ პარლამენტის ვიცე-სპიკერმა გიორგი ვოლსკიმ განაცხადა.

დეპუტატი გამოეხმაურა კონკრეტული პოლიტიკოსების მხრიდან განცხადებებს, რომ ხალხი ქუჩაში უნდა გამოვიდეს.

„ესენი რუსეთისკენ მიდიან და ახლავე აქცია უნდა ჩავატაროთ, თორემ რუსეთის შემადგენლობაში შევა საქართველო“ - როგორი ყალბი განცხადებაა და მიმართული ახალგაზრდების მოტყუებისკენ. რაც წერია კონსტიტუციაში, ჩვენს საგარეო კურსთან დაკავშირებით, ეს არის უცვლელი და არა იმიტომ, რომ ვიღაცას ვეკეკლუცებით და არა იმიტომ, რომ ვაშაძემ აქცია არ ჩაატაროს, არამედ იმიტომ, რომ ეს ჩვენ გვჭირდება, ჩვენი ქვეყნის უსაფრთხოებას სჭირდება და ეკონომიკურ განვითარებას. ამიტომაა შეტანილი ეს მუხლი კონსტიტუციაში, რაშიც მონაწილეობა არ მიუღია არცერთ რადიკალურ სუბიექტს.

თუნდაც საფრანგეთის პრეზიდენტის განცხადება, ან ისრაელში მიმდინარე პროცესები რომ ავიღოთ - ვინ უშვებს იმას, რომ ეს ვითარება განაპირობებს ისეთ დაპირისპირებას, რომელიც საერთო ევროპულ ინტერესებს დაანგრევს. ხდება ასეთი რამ, ჩვენ განსხვავებული აზრები გვაქვს, თუნდაც აშშ-ის ელჩი იყოს. ეს არ არის წინაპირობა და საფუძველი იმისა, რომ გიორგი ვაშაძე გამოვიდეს და ბავშვებს მოუწოდოს ხელში „მოლოტოვის კოქტეილები“ აიღონ“, - განაცხადა ვოლსკიმ.