ჯანელიძე: ძალიან მნიშვნელოვანია მერკელთან შეხვედრა, ასევე შეხვედრის დრო

„გერმანიის კანცლერთან შეხვედრაზე ვისაუბრეთ რუსეთ-საქართველოს კონფლიქტზე, ოკუპირებულ რეგიონში არსებულ ძალიან მძიმე მდგომარეობაზე, ასევე, საოკუპაციო ხაზთან არსებულ მდგომარეობაზე და პროვოკაციებზე,-  განაცხადა საგარეო საქმეთა მინისტრმა მიხეილ ჯანელიძემ საქართველოს პრემიერმინისტრის და გერმანიის კანცლერ ანგელა მერკელთან შეხვედრის შემდეგ. 

"ქართულმა მხარემ ხაზი გაუსვა საქართველოს ძალიან მტკიცე პოლიტიკას, რომელიც მიმართულია კონფლიქტის მშვიდობიანი დარეგულირებისაკენ. კიდევ ერთხელ მინდა ხაზი გავუსვა, რომ ჩვენ ამ შეხვედრის დროს შევეხეთ დღის წესრიგში მდგარ ყველა მნიშვნელოვან საკითხს. საქართველო-გერმანიას შორის პოლიტიკური დიალოგი ძალიან მაღალ დონეზე, აქტიურად ვითარდება”, - განაცხადა ჯანელიძემ. 

საგარეოს საქმეთა მინისტრის თქმით, გერმანიის კანცლერთან შეხვედრა ძალიან მნიშვნელოვანი იყო. 

,,ძალიან მნიშვნელოვანია ეს შეხვედრა, ასევე შეხვედრის დრო. მოგეხსენებათ, გერმანიაში ახლახან გაიმართა არჩევნები და პრემიერმინისტრს ჰქონდა საშუალება პირადად მიელოცა კანცლერისთვის მისი პარტიის გამარჯვება ამ არჩევნებში. ეს არის ძალიან მნიშვნელოვანი საქართველო-გერმანიის ურთიერთობებისთვის და ასევე, ევროპისთვისაც. შეხვედრაზე ჩვენ შევეხეთ ქართულ-გერმანულ ურთიერთობებს, რომელიც ძალიან აქტიურად ვითარდება როგორც პოლიტიკური, ასევე ეკონომიკური მიმართულებით. პრემიერმინისტრმა ისაუბრა საქართველოში ბოლო წლებში განხორციელებულ მნიშვნელოვან რეფორმებზე, რომელმაც შექმნა განსაკუთრებულად ხელსაყრელი პირობები უცხოური ინვესტიციების და ბიზნესისთვის. პრემიერმა ასევე ისაუბრა ასოცირების შეთანხმების წარმატებულ იმპლემენტაციაზე. ყველა ამ ნაბიჯმა, პოლიტიკურმა და ეკონომიკურმა განვითარებამ ქვეყანაში შექმნა განსაკუთრებული პირობები და შესაძლებლობები გერმანული ბიზნესისთვის. პოლიტიკური და ეკონომიკური ურთიერთობების პარალელურად, ვისაუბრეთ გერმანიასთან საჭიროა უფრო მეტი ინფრასტრუქტურული და საკომუნიკაციო კავშირების განვითარება, ეს მნიშვნელოვანი არა მხოლოდ საქართველოსთვის, არამედ რეგიონისთვის და მთლიანად ევროკავშირისთვის. შეხვედრაზე განხილული იყო უსაფრთხოების პოლიტიკის საკითხები. საქართველოს როლი როგორც რეგიონში, ასევე გლობალური უსაფრთხოების საკითხებში. მნიშვნელოვანი საქართველო-გერმანიის თანამშრომლობა ავღანეთში მტკიცე მხარდაჭერის მისიაში. გერმანულმა მხარემ მაღალი შეფასება მისცა ამ საკითხში საქართველოს, ქართველი სამხედროების როლს”, - დასძინა საგარეო საქმეთა მინისტრმა. 

საქართველოს პრემიერმინისტრი გიორგი კვირიკაშვილის დღეს გერმანიის კანცლერს ანგელა მერკელს შეხვდა. საქართველოს პრემიერმინისტრი ერთ-ერთი პირველი უცხოელი ლიდერია, რომელიც ანგელა მერკელს საპარლამენტო არჩევნებში  გამარჯვების შემდეგ შეხვდა.