ზაზა ხატიაშვილი ირმა ჭკადუას შესახებ ოხანაშვილის სასამართლო ჩვენებას ეხმიანება

ადვოკატთა ასოციაციის თავმჯდომარე ზაზა ხატიაშვილი დეკანოზის საქმის სასამართლო პროცესზე პატრიარქის დაცვის ყოფილი უფროსის სოსო ოხანაშვილის ჩვენებას ეხმიანება, რომელიც მედიასაშუალებებით გავრცელდა.

ხატიაშვილის თქმით, სოსო ოხანაშვილი ადვოკატ ირმა ჭკადუას შესახებ დაუზუსტებელ ინფორმაციას ავრცელებს.

"მედიასაშუალებებით გავრცელდა მაღალი საზოგადოებრივი ინტერესის მქონე, დეკანოზ მამალაძის ბრალდების საქმის ერთ-ერთი მოწმის - სოსო ოხანაშვილის ჩვენების ფრაგმენტი, სადაც ის ყოველგვარი მტკიცებულების გარეშე ავრცელებს დაუზუსტებელ და ჩემი შეფასებით, აშკარად ცილისმწამებლურ ინფორმაციას ადვოკატთა ასოციაციის აღმასრულებელი საბჭოს წევრის ირმა ჭკადუას სავარაუდო მონაწილეობაზე საპატრიარქოს მხრიდან მსჯავრდებულთა შეწყალების პროცესში. მე, როგორც ადვოკატთა ასოციაციაციის თავმჯდომარეს, მიუღებლად მიმაჩნია ადვოკატთა მიმართ დაუსაბუთებელი და ცილისმწამებლური განცხადებების გავრცელება, რომელიც მიმართულია ადვოკატის დისკრედიტაციისაკენ და მიზნად ისახავს თავისუფალი პროფესია - ადვოკატის ნდობის შელახვას საზოგადოებაში. ამასთან, ადვოკატთა როლის შესახებ გაეროს ძირითადი პრინციპების მე-16 მუხლის თანახმად ადვოკატების მიერ თავიანთი პროფესიული ფუნქციების განხორციელებისას უზრუნველყოფილი უნდა იყოს მისი საქმიანობა დაბრკოლების, ღირსების შელახვის და არასათანადო ჩარევის გარეშე. ასევე, დაუშებელია ადვოკატის შევიწროება, მასზე ზეწოლა, მორალური თუ მატერიალური ზიანის მიყენება", - წერია ზაზა ხატიაშვილის განცხადებაში.

სოსო ოხანაშვილის მიერ სასამართლოს დახურულ სხდომაზე მიცემულ ჩვენებას გამოეხმაურა ეკა ბესელიაც. ბესელიას თქმით, საქმის დახურული პროცესის მასალების "გასაჯაროება კანონის დარღვევაა და უკანონოდ მოპოვებული ჩანაწერების გასაჯაროებაც, გავრცელებაც - კანონით აკრძალულია და არ წერია სისსხლის სამართლის კოდექსში რომ გამონაკლისი უფლება აქვს ტელევიზიას, ჟურნალისტს", - წერს ბესელია facebook-ზე.

"რუსთავი 2"-მა პატრიარქის დაცვის ყოფილი უფროსის სოსო ოხანაშვილის სასამართლოზე მიცემული ჩვენების აუდიო ჩანაწერი გუშინ გამოაქვეყნა. ოხანაშვილი ჩვენებაში ამბობს, რომ საპატრიარქოში არსებულ პატიმართა შეწყალების კომისიაში სიებს კონკრეტული ადამიანები ადგენდნენ, რაშიც გარკვეულ თანხას იღებდნენ. ოხანაშვილის თქმით ეს ადამიანები არიან პატრიარქის მდივან-რეფერანტი შორენა თეთრუაშვილი, საპროკურორო საბჭოს წევრი ირმა ჭკადუა და უფლებადამცველი ნანა კაკაბაძე.

პროკურატურამ დეკანოზ მამალაძის საქმის დახურული სასამართლო პროცესების ამსახველი ვიდეომასალების მედიასაშუალებებში გავრცელების ფაქტებზე გამოძიება დაიწყო. თუმცა საქმეზე ჩვენება დეკანოზის არცერთმა ადვოკატმა არ მისცა.

5 სექტემბერს მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენის გამოცხადებას ბრალდებული არ ესწრებოდა.

სისხლის სამართლის კოდექსის 374-ე მუხლი გამოძიების მონაცემის გახმაურებას გულისხმობს. ამ მუხლის თანახმად, ოპერატიულ-სამძებრო საქმიანობის მასალების ან გამოძიების მონაცემის გახმაურება იმის მიერ, ვინც კანონით დადგენილი წესით გაფრთხილებული იყო მისი გახმაურების აკრძალვის შესახებ, ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ერთ წლამდე.