საპატრიარქო მედიაში გასულ სიუჟეტს განცხადებით გამოეხმაურა

საპატრიარქო პატიმრების შეწყალებასთან დაკავშირებით მედიაში გავრცელებულ ინფორმაციას გამოეხმაურა. როგორც საპატრიარქოს განცხადებაშია ნათქვამი, „რუსთავი 2“-ის 14 ოქტომბრის გადაცემაში ბრალდების ობიექტი, საპატრიარქოს თანამშრომლებთან ერთად, სახელმწიფო სტრუქტურებისა და არასამთავრობო სექტორის წარმომადგენლებიც გახდნენ.

მათივე ინფორმაციით, შორენა თეთრუაშვილის მიერ დოკუმენტაციაზე ხელმოწერასთან დაკავშირებული ინფორმაცია სიმართლეს არ შეესაბამება და ეს საკითხი პატრიარქთან შეთანხმებით ხდებოდა. 

"სიუჟეტში ითქვა, თითქოს საპატრიარქოს მხრიდან გარკვეული ანაზღაურების ფასად ხდებოდა ციხიდან პატიმრების გათავისუფლება, ამ ჭორს სხვა სახით ადრეც ავრცელებდნენ, ამჯერად კი კორუფციული გარიგების თანამონაწილეებად დაასახელეს მეუფე თეოდორე, მზექალა ჭინჭარაულ-ქარსელაძე, შორენა თეთრუაშვილი, ასევე ქალბატონები: ეკა ბესელია, ირმა ჭკადუა, ნანა კაკაბაძე.

საპატრიარქოსთან არსებული ,,მსჯავრდებულთა შეწყალების საკითხთა შემსწავლელი კომისია” სასჯელაღსრულების დაწესებულებებში მყოფთა შესახებ მხოლოდ სარეკომენდაციო მასალებს ამზადებს და მას მსჯავრდებულთა შეწყალებასთან შეხება არა აქვს.

იმავე გადაცემაში ამის თაობაზე ისაუბრა შეწყალების სახელმწიფო კომისიის თავმჯდომარემ, ბატონმა ზვიად ქორიძემ, მაგრამ სიუჟეტის ავტორებმა სიცრუის ტირაჟირება არჩიეს და ტელემაყურებლისთვის დაცვის ყოფილი უფროსის, იოსებ ოხანაშვილის ცილისწამებების და თავისი ინტერპრეტაციების თავსმოხვევა სცადეს.

ვფიქრობთ, მიზანმიმართული ქმედებიდან მომდინარეობდა ,,კურიერში” გაჟღერებული მეორე თემაც, – დოკუმენტებზე შორენა თეთრუაშვილის ხელმოწერასთან დაკავშირებული უსაფუძვლო ბრალდება.

დაინტერესებულ პირებს განვუმარტავთ, რომ მდივან-რეფერენტის ხელმოწერა ხდებოდა და ხდება კათოლიკოს-პატრიარქის მიერ დელეგირებული უფლებით.

ბოლოს კი დავძენთ: სასამართლო პროცესებიდან დაუდგენელი პიროვნების მიერ შერჩეული, ამოგლეჯილი მასალების მასმედიაში გასაჯაროება, თანაც მიცემული ჩვენებების ტენდენციური გაშუქება, ვფიქრობთ, უხეშად არღვევს ჟურნალისტურ ეთიკას, რაც ამა თუ იმ არხის არაობიექტურობაზე მეტყველებს და მათ დაინტერესებულ მხარედ წარმოაჩენს."-ნათქვამია საპატრიარქოს მიერ გავრცელებულ განცხადებაში.

"რუსთავი 2"-მა პატრიარქის დაცვის ყოფილი უფროსის სოსო ოხანაშვილის სასამართლოზე მიცემული ჩვენების აუდიო ჩანაწერი 14 ოქტომბერს გამოაქვეყნა.

ოხანაშვილი ჩვენებაში ამბობს, რომ საპატრიარქოში არსებულ პატიმართა შეწყალების კომისიაში სიებს კონკრეტული ადამიანები ადგენდნენ, რაშიც გარკვეულ თანხას იღებდნენ. ოხანაშვილის თქმით ეს ადამიანები არიან პატრიარქის მდივან-რეფერანტი შორენა თეთრუაშვილი, საპროკურორო საბჭოს წევრი ირმა ჭკადუა და უფლებადამცველი ნანა კაკაბაძე.

პროკურატურამ დეკანოზ მამალაძის საქმის დახურული სასამართლო პროცესების ამსახველი ვიდეომასალების მედიასაშუალებებში გავრცელების ფაქტებზე გამოძიება დაიწყო. თუმცა საქმეზე ჩვენება დეკანოზის არცერთმა ადვოკატმა არ მისცა.

5 სექტემბერს მოსამართლე ბესიკ ბუგიანაშვილმა დეკანოზ გიორგი მამალაძეს 9 წლით თავისუფლების აღკვეთა მიუსაჯა. განაჩენის გამოცხადებას ბრალდებული არ ესწრებოდა.

სისხლის სამართლის კოდექსის 374-ე მუხლი გამოძიების მონაცემის გახმაურებას გულისხმობს. ამ მუხლის თანახმად, ოპერატიულ-სამძებრო საქმიანობის მასალების ან გამოძიების მონაცემის გახმაურება იმის მიერ, ვინც კანონით დადგენილი წესით გაფრთხილებული იყო მისი გახმაურების აკრძალვის შესახებ, ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ერთ წლამდე.