ესტონეთის პრეზიდენტი: საქართველო ევროკავშირს უახლოვდება

ესტონეთის პრეზიდენტმა კერსტი კალიულაიდმა საქართველოსა და ევროკავშირს შორის ურთიერთობაზე ილაპარაკა და განაცხადა, რომ  „აღმოსავლეთ პარტნიორობის“ მონაწილე ქვეყნებიდან საქართველო ლიდერია", რომელიც "პატივს სცემს და იზიარებს ევროკავშირის ღირებულებებს". ამის შესახებ კალიულაიდმა საზოგადოებრივ მაუწყებელთან ინტერვიუში განაცხადა.

როგორც კერსტი კალიულაიდმა ინტერვიუში თქვა, „აღმოსავლეთ პარტნიორობის“ სამიტის წინ, ის მომავალ კვირას საქართველოს სოლიდარობის გამოხატვის მიზნით ეწვევა. 

"ინიციატივის მონაწილე ქვეყნებიდან  საქართველო ლიდერია. საქართველო პატივს სცემს და იზიარებს ჩვენს ღირებულებებს. საქართველოსთან ძალიან კარგი თანამშრომლობა გვაკავშირებს. ვისურვებდი უფრო მჭიდრო ეკონომიკურ თანამშრომლობას. დარწმუნებული ვარ, რომ ეს ვიზიტი ხელს შეუწყობს ჩვენი ურთიერთობების გაღრმავებას, მათ შორის ეკონომიკური თვალსაზრისითაც. არის ინვესტიციები, მაგრამ შეიძლება უფრო მეტი ინვესტიცია განხორციელდეს. ჩამოთვლილი ბევრი მიზეზის გამო, მე მოვდივარ ბიზნესმენების დიდ დელეგაციასთან ერთად საქართველოში. დელეგაციაშია ტარტუს უნივერსიტეტის რექტორიც. პოლიტიკურ და ეკონომიკურ ურთიერთობებთან ერთად, საკმაოდ კარგად ვთანამშრომლობთ განათლების სფეროში. ოფიციალური შეხვედრების გარდა, მე ვეწვევი ქუთაისს და წავიკითხავ ლექციას. ლექციის მთავარი თემა რეფორმები იქნება. ესტონეთს რეფორმების გატარების გამოცდილება აქვს და შეგვიძლია გაგიზიაროთ. კონკრეტულ მაგალითებზე დაყრდნობით, გვსურს გიჩვენოთ, თუ როგორ მოუტანა ესტონეთს ლიბერალ-დემოკრატიულ ღირებულებებზე აგებულმა რეფორმებმა ეკონომიკური განვითარებაც. საქართველო უკვე კარგად არის დამკვიდრებული ამ გზაზე, მაგრამ ჩემი აზრით, მაინც საინტერესო და წამახალისებელი იქნება მოსმენა, თუ როგორ გაატარა დამოუკიდებლობის მოპოვების შემდეგ ესტონეთმა სწრაფ ტემპში რეფორმები", - თქვა კერსტი კალიულაიდმა. 

ესტონეთის პრეზიდენტმა საქართველოსა და ევროკავშირს შორის უვიზო მიმოსვლის შესახებაც ილაპარაკა და თქვა, რომ ამ ფაქტით მოხარულია. 

"თქვენ სარგებლობთ უვიზო მიმოსვლით, ასევე საქართველოს აქვს ასოცირების ხელშეხკრულება, ღრმა და ყოვლისმომცველი თავისუფალი ვაჭრობის შესახებ გაფორმებული შეთანხმება.  ამიტომ  ვფიქრობ, რომ ახლა არ გვჭირდება საუბარი მხოლოდ იმაზე, თუ რა შეიძლება იყოს შემდგომი ნაბიჯები.  უნდა ვისაუბროთ, როგორ ვისარგებლებთ უვიზო რეჟიმით, თავისუფალი ვაჭრობითა და როგორ მოვახდენთ ასოცირების ხელშეკრულების იმპლემენტაციას",-განაცხადა ესტონეთის პრეზიედნტმა. 

აღმოსავლეთ პარტნიორობის სამიტამდე ერთი თვით ადრე საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა ფედერიკა მოგერინიმ საქართველოს მხარდამჭერი ვიდეომიმართვა გაავრცელა. 

წლევანდელი სამიტი 24 ნოემბერს ბრიუსელში გაიმართება.