თბილისის ისტორიულ მუზეუმ „ქარვასლაში“ „საზოგადოება ქართული“ დაფუძნდა

„საზოგადოება ქართული“ დღეს თბილისის ისტორიულ მუზეუმ „ქარვასლაში“ დაფუძნდა, სადაც საინიციატივო ჯგუფის ხელმძღვანელმა გიორგი გაბუნიამ მიწვეულ სტუმრებს მათი საზოგადოების მიმართვა გააცნო.

მიმართვის ტექსტში აღნიშნულია, რომ ახალი ორგანიზაციაში იწვევენ მეცნიერების, ხელოვნების, სპორტისა და განათლების სფეროს სხვადასხვა თაობის წარმომადგენელს.

„ქართული ენის ამ ღირსშესანიშნავ დღესასწაულზე გვსურს, გაცნობოთ ახალი ორგანიზაციის დაფუძნების თაობაზე, სახელწოდებით - „საზოგადოება ქართული“, სადაც ვიწვევთ მეცნიერების, ხელოვნების, სპორტისა და განათლების სფეროს სხვადასხვა თაობის წარმომადგენელს.

ჩვენ ასევე მივმართავთ თანამშრომლობისათვის საზღვარგარეთ მცხოვრებ ჩვენს თანამემამულეებს, ყველა მეგობარსა და კოლეგას.

ჩვენი ორგანიზაციის დაფუძნებით გვსურს, გამოვხატოთ მზაობა, რათა საზოგადოებაში დავამკვიდროთ: აკადემიური აზრი და სიტყვა;
რაციონალური ფიქრი და განსჯა ჩვენს წარსულზე, დღევანდელობასა და მომავალზე;

ურთიერთპატივისცემა, სიყვარული და ერთიანობა, რომელიც დღეს ძალიან ჭირდება ჩვენს საზოგადოებას.

ჩვენ კარგად გვესმის და ვხედავთ, რომ მსოფლიოში მიმდინარე სამხედრო კონფლიქტების პარალელურად, ადგილი აქვს ღირებულებათა ომს, რაც დიდი საფრთხის წინაშე აყენებს ჩვენს ეროვნულ ღირებულებებსა და ინტერესებს. შედეგად, რამდენიმე ათწლეულია, მუდმივ რყევას განიცდის ჩვენი საზოგადოება, ჩვენი კულტურა და სახელმწიფო.

ზემოაღნიშნული საფრთხეების გათვალისწინებით გვწამს და მიგვაჩნია, რომ ქართული საზოგადოება მაქსიმალურად უნდა კონცენტრირდეს სოლიდარობაზე, ტოლერანტობაზე, თანასწორობაზე, მიმტევებლობაზე, ქალისადმი პატივისცემასა და უფროსის დაფასებაზე, ოჯახის და ადამიანის სიყვარულზე დაფუძნებულ ქართულ ცნობიერებასა და კულტურაზე.

ჩვენ, როგორც უძველესი ცივილიზაციის ერი, შთამომავალნი იმ დიდი ქართველებისა, რომელთა შემოქმედებამ საკაცობრიო სულიერი საგანძური გაამდიდრა და საყოველთაო ფასეულობები შექმნა, ვალდებულნი ვართ, შევინარჩუნოთ და ღირსეულად დავიცვათ მათი დანატოვარი მემკვიდრეობა - ჩვენი კულტურა და ტრადიციები, არ ვუღალატოთ ჩვენი თვითმყოფადობისა და იდენტობის მთავარ საფუძვლებს, ჩვენს საზრისსა და მიზნებს, იმ ფასეულობებს რისთვისაც 2000 წელზე მეტია იბრძვის ჩვენი მცირერიცხოვანი, მრავალჭირნახული და განსაკუთრებული ერი.

შესაბამისად, ჩვენი ერის წინაშე კვლავ დგას მთავარი ამოცანა - თანამედროვე, გლობალური ქარტეხილების ეპოქაში, დავიცვათ ჩვენი ერის თვითმყოფადობა, განვავითაროთ ჩვენი მეცნიერება, კულტურა, სპორტი და დავიცვათ ჩვენი სახელმწიფოს სუვერენიტეტი.

ამიტომ, ჩვენ, ვინც ვემსახურებით ჩვენი იდენტობის განმსაზღვრელ უმნიშვნელოვანეს ნიშანსვეტებს : ქართულ მეცნიერებას, ხელოვნებასა და განათლებას, სპორტს, სხვა დარგებს, ვერთიანდებით ერთი მიზნით, რომ ჩვენი სულიერების განმსაზღვრელი ეს ფენომენები თაობათა ერთიანობისა და მემკვიდრეობითობის ბერკეტებად იქცნენ.

აქედან გამომდინარე ჩვენ ვითხოვთ: სახელმწიფო ენის დაცვისა და განვითარების პოლიტიკის მეტად აქტიურად წარმართვას, ენის სიწმინდის დაცვას, მათ შორის, ჩვენი ეროვნული საგანძურის - მეგრულ-ლაზური და სვანური ენების მოვლა-პატრონობას და საკანონმდებლო დონეზე ამ ენათა დაცვის მექანიზმების შექმნას.

სკოლებში ქართული ტრადიციული ხელოვნების შეტანა და მის ხელმისაწვდომობას ჩვენი ახალგაზრდებისთვის.

ვითხოვთ, სახელმწიფომ განსაკუთრებული ყურადღება მიაქციოს დემოგრაფიულ პრობლემებს, რომელიც სულ უფრო მზარდი ხდება და საფრთხეს უქმნის ჩვენი ერის მომავალს.

სახელმწიფომ მეტი მზრუნველობა და ყურადღება გამოიჩინოს ოჯახის (განსაკუთრებით ახლად შექმნილი ოჯახების) სათანადო მხარდაჭერასა და დაცვაზე, განსაკუთრებული პრიორიტეტი მიენიჭოს მრავალშვილიანი ოჯახის გაძლიერებას. ამ მიმართულებით „საზოგადოება ქართული“ უახლოეს მომავალში წარადგენს საკუთარ წინადადებებს.

ვითხოვთ, სახელმწიფომ იზრუნოს და შექმნას სათანადო პირობები, რათა ემიგრაციაში მცხოვრები ჩვენი მოქალაქეები, განსაკუთრებით ახალგაზრდები, დაინტერესდნენ სამშობლოში დაბრუნებით და მათი ეს უზარმაზარი ინტელექტუალური თუ სხვა სახის რესურსები მაქსიმალურად იქნეს გამოყენებული ქვეყნისა და ერის საკეთილდღეოდ.

ჩვენ ასევე მივიჩნევთ, რომ:

მიზეზთა გამო, დღემდე საზოგადოებრივი პროცესებისგან გარკვეულად დისტანცირებული ერის ინტელექტუალური, განათლებული და კულტურული ნაწილი უნდა დაუბრუნდეს არენას და აქტიურად ჩაერთოს საზოგადოებრივ ცხოვრებაში, გახდეს ქვეყანაში სტაბილურობისა და განვითარების მძლავრი საზოგადოებრივი აზრის წყარო.

ვითხოვთ, გამახვილდეს ყურადღება და ევროპული სტანდარტების გათვალისწინებით გადაიხედოს დღეს არსებული, კანონით დადგენილი პასუხისმგებლობა ცილისწამებასა და სიძულვილის ენის გამოყენებაზე, რომელიც ყველას ეხება, განსაკუთრებული სიმძაფრით კი გამოიყენება საქართველოს პატრიარქისა და ქართული ეკლესიის წინააღმდეგ, რომლის დამსახურება ქართველი ერის წინაშე აუწონელია და იგი ჩვენი კულტურისა და იდენტობის განუყოფელი ნაწილია.

ასევე ვთვლით, რომ საჭიროა ქალაქისა და სოფლის მაცხოვრებლების მეტი ინტეგრაცია და ჩართულობა კულტურულ პროცესებში, მსოფლიოს კულტურული მიღწევებისადმი ხელმისაწვდომობა და ქართული კულტურის კიდევ უფრო მეტი პოპულარიზაცია.

ზემოაღნიშნული მიზნების მიღწევისთვის აუცილებლად მიგვაჩნია:

საკანონმდებლო წინადადებების (ინიციატივების) მომზადება პრობლემად ქცეულ საკითხებთან დაკავშირებით და მათი რეალიზაციის მიზნით სახელმწიფო ინსტიტუტებთან აქტიური თანამშრომლობა.

ქართული საზოგადოების მონაწილეობის გააქტიურება ერისა და ქვეყნისთვის საჭირბოროტო ყველა საკითხის გადაწყვეტაში, ქვეყანაში სარეფერენდუმო (საპეტიციო) დემოკრატიული სისტემის დამკვიდრება.

და ბოლოს, ჩვენ ისე უნდა გავხდეთ თანამედროვე ევროპული სახელმწიფო, ერი და საზოგადოება, რომ არ მოვწყდეთ ჩვენს სულიერებასა და ტრადიციებს. ეს გზა კი ჩვენს კულტურასა და ხელოვნებაზე გადის, რომელიც ერის არჩევანის თვითმყოფადობისა და იდენტობის განმსაზღვრელი უნივერსალური ფენომენია. ყველას მოგიწოდებთ, გავერთიანდეთ, რათა ჩვენი შრომით, სოლიდარობით, თანამშრომლობით, ადამიანზე, კულტურასა და გარემოზე ზრუნვით საქართველო ვმართოთ ჩვენ თვითონ“, - განაცხადა საზოგადოების საინიციატივო ჯგუფის ხელმძღვანელმა, გიორგი გაბუნიამ.