ალიანსი უსაფრთხო გზებისთვის: პარკირება უნდა გახდეს ფასიანი

ორგანიზაცია "ალიანსი უსაფრთხო გზებისათვის" თავმჯდომარე ეკა ლალიაშვილი სითი პარკის საქმიანობას უარყოფითად აფასებს და ფიქრობს, რომ კომპანიის ბაზრიდან გაშვების შემთხვევაში, დედაქალაქი უბნებად უნდა დაიყოს და ცენტრალურ ნაწილში პარკირება ფასიანი უნდა გახდეს. 

ლალიაშვილის თქმით, ასეთ შემთხვევაში ქალაქში ნაკლები გამონაბოლქვი და ნაკლები საცობები იქნება და ცენტრში პარკირების სიძვირის გამო, გადაუდებელი აუცილებლობის გარეშე მოქალაქეები ავტომანქანების გაჩერებას მოერიდებიან. 

"პარკირების თემაზე ვინც არის პასუხისმგებელი კომპანია, მოქალაქეების დამოკიდებულებიდან გამომდინარე, გვაძლევს იმის თქმის საშუალებას, რომ ვერ ასრულებს ჯეროვნად თავის ფუნქციას და არ ემსახურება მძღოლებს ისე, როგორც ეს უნდა კეთდებოდეს. მთავარი ამოსავალი უნდა იყოს სათანადო მომსახურება მოქალაქეებისთვის, ამ შემთხვევაში კი ჩვენ გვყავს ძალიან ბევრი უკმაყოფილო მოქალაქე, გვაქვს მოუწესრიგებელი პარკირების სისტემა", - განაცხადა ეკა ლალიაშვილმა და დასძინა, რომ ახალი მერის პირობებში, პარკირების სისტემასთან ერთად, ბევრი სხვა მიმართულებაა კომპლექსურად დასაგეგმი.

მანამდე  კახა კალაძემ განაცხადა, რომ შესაძლოა "სითი პარკის" წინააღმდეგ სამართლებრივი დავა დაიწყოს. რის გამოც, ის ოპოზიციამ გააკრიტიკა.

მისივე თქმით, ის მერიაში აუდიტის სამსახურის მიწვევას გეგმავს. ამ ნაბიჯს იმით ხსნის, რომ ის ძალიან მნიშვნელოვან უწყებას იბარებს და წინასწარ უნდა იცოდეს, რა ვითარება ხვდება მერიაში, - ამის შესახებ მან “ქრონიკასთან“ ინტერვიუში განაცხადა.

კახა კალაძე თბილისის მერის ფუნქციების განხორციელებას 12 ნოემბრიდან შეუდგება.

21 ოქტომბერს საქართველოში ჩატარებული თვითმმართველობის არჩევნების შედეგების მიხედვით, მერმა კახა კალაძემ არჩევნებში ხმათა 51.09% მიიღო.