მამუკა მდინარაძე: უმძიმესია, როცა ახალგაზრდა კაცს დედას, ცოლ-შვილს გაგინებენ, რამდენად უნდა აიტანო, ვის მოვუწოდო, არ ვიცი, მაგრამ, ბიჭებო, მივმართავ სპეცრაზმელებს, ამას იყენებენ სამშობლოს წინააღმდეგ და დღევანდელი ნარატივი ამაზეა გადართული

„ქართული ოცნების“ აღმასრულებელმა მდივანმა, საპარლამენტო უმრავლესობის ლიდერმა, ფრაქცია „ქართული ოცნების“ თავმჯდომარემ მამუკა მდინარაძემ 28 ნოემბერს საპროტესტო აქციაზე განვითარებული მოვლენები შეაფასა. მან უპასუხა კითხვას აქციაზე დაშავებული ჟურნალისტების შესახებ და ამასთან დაკავშირებით „იმედის“ ჟურნალისტზე, მეგი ნარსავიძეზე თავდასხმის ფაქტი გაიხსენა.

„ზოგ ადამიანს მიაჩნია, რომ მეგი ნარსავიძეზე თავდასხმა არაფერი იყო. მე დღეს კამათი მქონდა რამდენიმე ადამიანთან, თქვენს კოლეგებთან მათ შორის. მიაჩნიათ, რომ მეგი ნარსავიძეზე თავდასხმა არაფერი იყო, ამასთან შედარებით, გურამ როგავაზეა საუბარი. მე გონია, რომ ისიც ამორალურია და ესეც არის ძალიან ცუდი რამ, რასაც არ უნდა უშვებდეს არავინ. რაც არ უნდა ბინძური პროვოკაციის ავტორი იყოს რომელიმე ჟურნალისტი, ჩვენ და პოლიციელმა მაქსიმალურად უნდა ვცადოთ, რომ მის მიმართ ფიზიკური ძალადობა არ განხორციელდეს. ამ შემთხვევას მე პირადად ვმიჯნავ ოპერატორის შემთხვევისგან, სადაც ადამიანური შეცდომა იყო პოლიციელის. ზუსტად ვიცი, რას აკეთებდა გურამ როგავა მანამდე, თუნდაც, საჯარო და ღია წყაროებში რაც იძებნება, ისიც საკმარისი შეიძლება, არ იყოს და რისთვის საკმარისი, ამაზე საერთოდ არ ვსაუბრობ.

მინდა, სპეცრაზმელებს მივმართო იმიტომ, რომ შეიძლება წინ ასეთი რამდენიმე მძიმე დღე იყოს. მე მესმის, ქართველი კაცისთვის, ახალგაზრდა ვჟკაცი ბიჭებისთვის რა მძიმეა, როდესაც გვერდით შენს მეგობარს გისახიჩრებენ, საოპერაციო რომ ხდება, ესეც პირველ რიგში დასაგმობი რამ არის, უმძიმესია. დედას და ცოლ-შვილს გაგინებენ - ესეც ზუსტად ვიცი, რატომ ვთქვი ახლა. უმძიმესია, ახალგაზრდა კაცს დედას და ცოლ-შვილს გაგინებენ, რამდენად უნდა აიტანო და ვის მოვუწოდო, ესეც არ ვიცი, მაგრამ მიუხედავად ამისა, სულ უნდა გქონდეთ თავში. ბიჭებო - მივმართავ სპეცრაზმელებს, ამას იყენებენ შენი სამშობლოს წინააღმდეგ და დღევანდელი ნარატივი ამაზეა გადართული და ტყუილ-მართალზე, განცხადებაში რა ეწერა, აღარავინ ლაპარაკობს.

ამიტომ, გთხოვთ, თქვენი ქვეყნისთვის, რომელიც არანაკლებად გიყვართ, ვიდრე თქვენი ოჯახები, აიღოთ კიდევ მეტი პასუხისმგებლობა და თავსზევით კიდევ მეტი ძალა იპოვნოთ და ამ შემთხვევაშიც კი რაღაცნაირად მოითმინოთ. ჩვენი მხრიდან შეიძლება, ადვილი სალაპარაკოა, ჩვენ მივეჩვიეთ ამ რაღაცებს და ურთულესია, ახალგაზრდა მამაკაცებს მოუწოდო, რომ ესეც მოითმინონ. მესმის, რომ გისახიჩრებენ გვერდზე - ხან შურდულით რკინის ბურთულებს ესვრიან პოლიციელებს და სპეცრაზმელებს, თავებს უტეხენ და საოპერაციოების ხდებიან ეს ბიჭები, დედას და ცოლ-შვილს აგინებენ, ყურში ჩასჩურჩულებენ საზიზღრობებს, ურთულესია. მაგრამ ამით მერე აზიანებენ თქვენს სამშობლოს, ამით აზიანებენ მშვიდობას და თქვენი ქვეყნის ეროვნულ ინტერესებს“, - განაცხადა მამუკა მდინარაძემ.

მან მხარდაჭერა გამოუცხადა ყველა სპეცრაზმელსა და პოლიციელს.

„ამიტომ ეს გახსოვდეთ მუდამ, ჩემი მობოდიშებით თხოვნაა თითოეული თქვენგანის მიმართ. მე მხარს ვუჭერ ასევე ყველა პოლიციელს, ყველა სპეცრაზმელს, რომელიც თავისი სამშობლოს სიყვარულით და თავისი საქმის ერთგულებით დგას იქ, ისიც უნდა დავგმოთ და ისიც უნდა დავგმოთ, რასაც მოქალაქეების მიმართ ახორციელებენ, რასაც აკეთებენ სპეცრაზმელების და პოლიციელების მიმართ, როგორ მიმართავენ. პრეზიდენტ ჰქვია ქალს, რომელიც „რუსო, რუსო,“ საზიზღრობებს კადრულობს. ქართველ პოლიციელს რომ რუსს ეძახის, ის პრეზიდენტია?“, - აღნიშნა მდინარაძემ.

მან ამორალური უწოდა იმ ადამიანების შფოთვას, რომლებმაც მეგი ნარსავიძის მიმართ დაფიქსირებული თავდასხმა არ შეიმჩნიეს.

„მაგრამ ასევე ამორალურია იმ ადამიანების მხრიდან შფოთვა და წუწუნი ამ ყველაფერზე, რომლებმაც ის საზიზღრობა, რაც ვნახეთ მეგი ნარსავიძის მიმართ და და კამერების წინ ვერც კი ვიმეორებთ, არც შეიმჩნიეს და აქ მესხდნენ თქვენი კოლეგები, რომლებსაც ვერ წამოვაცდენინე სიტყვა, რომ ამორალური იყო ეს ყველაფერი“, - განაცხადა მმართველი პარტიის აღმასრულებელმა მდივანმა.