ლევან გიგინეიშვილი: ყოველთვის უნდა გამოდიოდე შენი ერის სასიცოცხლო ინტერესებიდან და ამის შუქზე განიხილო ყველაფერი

ყოველთვის - პირად ცხოვრებაშიც და შენი ერის ცხოვრებაშიც უნდა გამოდიოდე შენი ერის სასიცოცხლო ინტერესებიდან და ამის შუქზე განიხილო ყველაფერი, - განაცხადა ფილოლოგმა, პროფესორმა ლევან გიგინეიშვილმა გადაცემაში „იმედის კვირა“ მსოფლიოში შექმნილ გეოპოლიტიკურ ვითარებაში საქართველოს ადგილისა და ამ ვითარებაში ქვეყნის ინტერესების დაცვის მნიშვნელობაზე საუბრისას.

მან აღნიშნა, რომ შესაძლოა, გარკვეული არ გათვლა იყო დასავლეთის მხრიდან, რა შეიძლებოდა, უკრაინაში მომხდარიყო.

„ყოველთვის შეიძლება, ასეთი შეცდომები დაუშვას მათ შორის, შენმა მოკავშირე ქვეყანამაც და ამიტომ ყველაფრის საკუთარი გონების შუქზე უნდა გაატარო. ყოველთვის - პირად ცხოვრებაშიც და შენი ერის ცხოვრებაშიც უნდა გამოდიოდე შენი ერის სასიცოცხლო ინტერესებიდან და ამის შუქზე განიხილო ყველაფერი. საქართველოს ხელისუფლება ამბობს, რომ იყო ჩვენზე ზეწოლა, რომ ჩავრთულიყავით ამ კონფლიქტში. მე ვფიქრობ, რომ შეუძლებელია, ისინი ამას იტყუებოდნენ”, - განაცხადა ლევან გიგინეიშვილმა.

მან გაიხსენა, რომ საბჭოთა კავშირის დაშლის შემდეგ ყველაფერი დასავლურის მიმართ ერთგვარი უკრიტიკო მიმღებლობა იყო.

„საბჭოთა კავშირის დაშლის მერე მეც მქონდა განცდა, რომ ყველაფერი, რაც მოდის დასავლეთიდან, ყველაფერი მარტო კარგი არის, რომ ეს სიბნელე, ტოტალიტარული რეჟიმი უნდა გადავლახო და რაც მეტი დასავლეთი, მით უკეთესი - თითქოს, უკრიტიკო მიღება.

ნახევრად ხუმრობით უთხრა შევარდნაძემ ამერიკელებს, ცარიელი ქაღალდი რომ მომცეთ, ხელს მოგიწერთ და რაც გინდათ, ის ჩაწერეთო. ასეთი ნდობა იყო, მაგრამ ასეთი ჰიპერტროფირებული ნდობაც არ ვარგა. ყველაფერი მაინც უნდა გაატარო შენი გონების შუქზე, შენი გონების ბრძმედში უნდა გაატარო ყველაფერი და შენი ეროვნული ინტერესებიდან გამოხვიდე. არ უნდა იყო წამხედური. ილია ჭავჭავაძემ ძალინ კარგად იცოდა დასავლეთი, ევროპის მიმოხილვებს წერდა „ივერიაში“, ის ამას ასადაგებდა ქართულ ვითარებასთან, რომ ის მივიღოთ, რაც ჩვენ გამოგვადგება გადარჩენისთვის და განვითარებისთვის”, - აღნიშნა ლევან გიგინეიშვილმა.