USAID-ი ბრიტანეთის საგარეო საქმეთა სამინისტრომ ჩაანაცვლა- 2025 წლის არჩევნებთან დაკავშირებით ბრიტანეთის საგარეო უწყება საგრანტო პროგრამას აცხადებს

მას შემდეგ, რაც რადიკალურ ოპოზიციას და მასთან დაკავშირებულ „ენჯეოებს“ USAID-ისა და NED-ის მსუყე ფინანსები შემოაკლდათ, 2025 წლის თვითმმართველობის არჩევნების მოახლოებასთან ერთად, ე.წ მდიდარი „ენჯეოების“ დაფინანსების წყაროს ალტერლატივამაც არ დააყოვნა.

ამჯერად ასპარეზზე ბრიტანეთის საგარეო საქმეთა სამინისტრო შემოდის. ბრიტანეთის მთავრობის ოფიციალურ ვებ-გვერდზე გამოქვეყნებული ინფორმაციის მიხედვით, დიდი ბრიტანეთის საგარეო საქმეთა სამინისტრო, საქართველოში მუნიციპალური არჩევნების წინ საგრანტო პროგრამას აცხადებს, რათა „ხელი შეუწყოს 2025 წლის ოქტომბერში დაგეგმილი საქართველოს მუნიციპალური არჩევნების ეფექტურად ჩატარებას“.

„თბილისში ბრიტანეთის საელჩოს მიზანია მხარი დაუჭიროს საქართველოში არჩევნების ჩატარებას უმაღლესი სტანდარტების შესაბამისად, რათა ქვეყნის ყველა მოქალაქეს ჰქონდეს შესაძლებლობა გამოხატოს საკუთარი აზრი. ორგანიზაციებს შეუძლიათ განაცხადი შეიტანონ გრანტზე, რომლის მაქსიმალური ოდენობა £100,000-ს შეადგენს, ამ მიზნის მხარდასაჭერი პროექტებისთვის“, - ნათქვამია განცხადებაში.

ოფიციალურად გამოქვეყნებულ ინფორმაციაში ასევე ვკითხულობთ: „გასულ წელს საქართველოში ჩატარდა ეროვნული არჩევნები, რომელსაც მონიტორინგი გაუწია ევროპის უსაფრთხოებისა და თანამშრომლობის ორგანიზაციის (ეუთო) დემოკრატიული ინსტიტუტებისა და ადამიანის უფლებების ოფისმა (ODIHR). მათმა ანგარიშმა გამოავლინა რიგი რეკომენდაციები მიმდინარე წელს დაგეგმილ მუნიციპალური არჩევნების წინ. ეფექტური საერთაშორისო და ადგილობრივი სადამკვირვებლო მისია გადამწყვეტი იქნება იმის შესაფასებლად, შესრულდა თუ არა ეს რეკომენდაციები."

„გაერთიანებული სამეფო მხარს უჭერს ეუთოს საერთაშორისო სადამკვირვებლო მისიის განლაგებას 2025 წლის მუნიციპალურ არჩევნებზე, მაგრამ ჩვენ ასევე ვაღიარებთ ადგილობრივი საარჩევნო დაკვირვების მნიშვნელობას“.

განცხადებაში ნათქვამია, რომ ეფექტური საერთაშორისო და ადგილობრივი საარჩევნო დაკვირვება უნდა განხორციელდეს საკმარისი რაოდენობის საერთაშორისო და ადგილობრივი დამკვირვებლის მონაწილეობით, რათა დადგინდეს საბოლოოდ, ჩატარდა თუ არა არჩევნები უმაღლესი სტანდარტების შესაბამისად.

„არჩევნების შემდგომი სანდო და ეფექტური ანგარიშგება ბრიტანეთის საელჩოს თბილისში აწვდის საკმარის ინფორმაციას იმის შესახებ, თუ რამდენად ჩატარდა არჩევნები უმაღლესი სტანდარტების შესაბამისად.",- წერია განცხადებაში .

ეს უკანასკნელი ადგილობრივ სადამკვირვებლო ორგანიზაციებთან დაკავშირებით შეიძლება სადაოდ ჩაითვალოს, რადგან 2024 წლის საპარალამენტო არჩევნებთან დაკავშირებით, რომელიც ყველანაირი სტანდარტის დაცვით ჩატარდა და ამას ეუთო/ოდირის დასკვნაც ადასტურებს, სწორედ უცხოეთიდან დაფინანსებული ე.წ მდიდარი ენჯეოებისა და რადიკალური ოპოზიციის მხრიდან გახდა სადაო. მათგან ორკესტრირებულად ისმენდა საზოგადოება სპეკულაციურ განცხადებებს არჩევნების გაყალბებასთან დაკავშირებით. აქვე აღსანიშნავია, რომ ვერცერთმა მათგანმა პროკურატურას გაყალბების მტკიცებულება ვერ წარუდგინა.

ბრიტანეთის საგარეო უწყება განცხადებაში წერს, რომ „დაფინანსება არ შეიძლება გამოყენებული იყოს რაიმე სახის პოლიტიკური გზავნილისთვის, მათ შორის რომელიმე პოლიტიკური პარტიის ან ინდივიდის პოპულარიზაციისთვის და/ან რომელიმე პოლიტიკური პარტიის ან ინდივიდის კრიტიკისთვის."

რამდენად იქნება ყოველივე ზემოთაღნიშნული დაცული იმ ფონზე, როდესაც საქართველოში არსებული ე.წ მდიდარი ენჯეოები არათუ ფარულად, არამედ ღიად და პირდაპირ რადიკალური ოპოზიციის ნარატივში სხედან, აქვთ საერთო მესიჯბოქსი, მიზნები, ორგანიზებას უკეთებენ პოლიტიკურ აქციებს და უფრო მეტიც, 2024 წლის არჩევნების დროს წინასაარჩევნო კამპანიაშიც კი მონაწილეობდნენ, რომელიც მიზნად ისახავდა, როგორც კონკრეტული პოლიტიკური პარტიების მხარდაჭერას, ასევე კონკრეტული პოლიტიკური პარტიის მხარდაჭერისგან თავის შეკავების მოწოდებებს.

ბრიტანეთის მთავრობის ოფიციალურ ვებ-გვერდზე გამოქვეყნებული ინფორმაციის მიხედვით, დაფინანსება ხელმისაწვდომია 2025 წლის მაისიდან 2025 წლის დეკემბრის ბოლომდე. განაცხადების მიღების ბოლო ვადა კი 2025 წლის 25 აპრილია.