თეა წულუკიანი: არ მეგულება ქართველი, ვისაც მოეწონება ბრიუსელმა შეაქოს იმის გამო, რომ ქართველი ბიჭები იღუპებიან, ვინაიდან ბრიუსელის ნაცვლად იბრძვიან. ჩვენ ამდენი სისხლი უბრალოდ აღარ გვაქვს

ბრიუსელი ჩვენზე გაბრაზებულია, ქართველებზე, განსაკუთრებით ქართველების ამჟამინდელ ხელისუფლებაზე და ამ გაბრაზებას თუ ბრაზს საკმაოდ უნიჭოდ გამოხატავს ქალბატონი სპიკერი, - განაცხადა გადაცემაში „იმედი LIVE“ პარლამენტის თავმჯდომარის მოადგილე თეა წულუკიანმა.

თეა წულუკიანის თქმით, „ბრიუსელი გაბრაზებულია იმის გამო, რომ ჩვენ არ მივეცით მათ საშუალება გავმხდარიყავით ის ბრძოლის ველი, რომელიც მათ აარიდებდა იმ საფრთხეს, რომლისაც თავად ეშინიათ“.

„ჩვენ რამდენიმე კვირის წინ ვიხილეთ, როგორც ეწოდება ამ თანამდებობას, ეს არის საფრანგეთის შეიარაღებული ძალების, ფრანგული ჯარების, ასე ეძახიან, გაერთიანებული შტაბების ხელმძღვანელი გამოვიდა და თქვა, რომ 3-4 წელიწადში ფრანგული ჯარი მზად უნდა იყოს რუსეთთან შეტაკებისთვის იმიტომ, რომ შეიძლება ეს მოხდეს. მან ასე თქვა. ამან საფრანგეთში ძალიან დიდი აჟიოტაჟი გამოიწვია, მის ამ განცხადებას უამრავი გადაცემა მიეძღვნა, რომელშიც როგორც სამოქალაქო ისე სამხედრო პირები, მათ შორის გენერლები მონაწილეობდნენ, პოლიტოლოგები, ანალიტიკოსები და ყველა იყო შეშფოთებული. ამ გადაცემებიდან გამოიკვეთა ის, რომ ყველა თვლის, უკრაინა იბრძვის მათ ნაცვლად. ისინი პირდაპირ ამბობენ ამას, რომ თუკი უკრაინა გააგრძელებს ბრძოლას, დასავლეთ ევროპამდე რუსეთი მივა უფრო გვიან და თუკი საქართველოც იბრძოლებდა აღმოსავლეთ და დასავლეთ ევროპამდე, რუსეთი ხომ მივიდოდა კიდევ უფრო გვიან. ეს უფრო გვიანის ეფექტი რომ არ მისცა მათ საქართველომ, ბრიუსელი არის ამის შესახებ გაბრაზებული. ეს არის მეორე დასკვნა, რაც ჩვენ ყველამ უნდა გავითავისოთ და აღარ უნდა გვიკვირდეს, რომ ამის გამო გაბრაზებული ბრიუსელი და მისი პრესსპიკერი ამ დონის შეურაცხყოფებს აყენებს ჩვენს ერს და მის არჩეულ ხელისუფლებას.

ჩვენ რომ დავთანხმებოდით იმას, რაც იყო მათი გეგმა, გაგვეხსნა ფრონტი და რუსეთი გვეიძულებინა მათი გაგებით, რომ თავისი შეიარაღებული რესურსი საქართველოზეც დაეხარჯა და ბალტიისპირეთი არ ყოფილიყო შემდგომი, როგორც მათ ეშინიათ, მსხვერპლი, ამისთვის ჩვენ დაგვაჯილდოებდნენ. შეიძლება იმიტომ, რომ ობიექტურად უკრაინასა და მოლდოვაზე ყველა კრიტერიუმით წინ ვართ და ჩვენ ვიქნებოდით მათი, ასე ვთქვათ, სანაქებო თოჯინა, მაგრამ როდესაც არჩევანი გაქვს, რა თქმა უნდა, ჩვენი ერის სიცოცხლე არის ყველაზე მაღალი ეროვნული ინტერესი. ჩვენ ამის დაცვა გადავწყვიტეთ ბიძინა ივანიშვილის ხელმძღვანელობით, რომელმაც ყველაზე მწარე, ყველაზე მძიმე, ყველაზე დიდი დარტყმები მიიღო, არ გატყდა და არ გაცვალა, როგორც მავანმა სცადა, რომ ეიძულებინა სხვადასხვა ბერკეტით, საკუთარი ინტერესი უფრო მაღლა დაეყენებინა, ვიდრე ერის ინტერესი, მან ეს არ გააკეთა. ჩვენ ეს არ გვიკვირს, მაგრამ მათ ალბათ გაუკვირდათ. ყოველ შემთხვევაში, მძიმე დღეში ჩააგდეს მთელი ოჯახი და ეს თქვენ ნახეთ, მაგრამ მათ ამას გაუძლეს და ჩვენც, ხელისუფლებამ გავამყარეთ ეს პოზიციები, შევძელით ის, რომ არ აღმოვჩნდით ბრიუსელის სანაქებო, რომ რა კარგები ხართ, ჩვენს ნაცვლად იბრძვით.

მე არ მეგულება საქართველოში ერთი ქართველი მაინც, ვისაც მოეწონება ბრიუსელმა შეაქოს იმის გამო, რომ ქართველი ბიჭები იღუპებიან, ვინაიდან ბრიუსელის ნაცვლად იბრძვიან. ჩვენ ამდენი სისხლი უბრალოდ აღარ გვაქვს“, - აღნიშნა თეა წულუკიანმა.