ნინო წილოსანი: ადამიანების შეწყალებაზე აპელირებით ძალიან მავნებლური პროცესი გაიმართა. რაც ეს ადამიანები დაკავებულები არიან, 4-5 ჯერ მოახდინა პრეზიდენტმა შეწყალების აქტი, თუმცა, არც ერთხელ გვინახავს მათი მოთხოვნა შეწყალებაზე

გუშინ სამწუხაროდ ადამიანების შეწყალებაზე აპელირებით ძალიან მავნებლური პროცესი გაიმართა. ვიცით, რომ შეწყალება ორმხრივი პროცესია. ერთია ადამიანი, ვინც ითხოვს შეწყალებას და მეორე, პრეზიდენტი, რომელმაც უნდა შეიწყალოს, - განაცხადა პარლამენტის თავმჯდომარის მოადგილემ ნინო წილოსანმა.

როგორც წილოსანმა აღნიშნა, იმ ადამიანების მხრიდან, რომელთა მიმართებითაც გუშინ მედია კამპანია იყო აგორებული, არც ერთხელ გაჟღერებულა შეწყალების მოთხოვნა.

„პროცედურულად ვიცით, რომ თავად პატიმრები წერენ განაცხადს შეწყალებასთან დაკავშირებით. თუმცა, იმ ადამიანებთან მიმართებით, ვისი ოჯახის წევრებიც და ვისთან მიმართებითაც დიდი მედია კამპანია იყო აწეული გუშინ ვიცით, რომ მათი მხრიდან არც პირადად მათი, არც მათი ოჯახის წევრების მხრიდან არც ერთხელ გაჟღერებულა შეწყალების მოთხოვნა.

რაც ეს ადამიანები დაკავებულები არიან, დაახლოებით 4-5 ჯერ მოახდინა პრეზიდენტმა შეწყალების აქტი, თუმცა, მათი მხრიდან არც ერთხელ გვინახავს კამპანიურად აგორებული მოთხოვნა შეწყალებასთან დაკავშირებით. რას შეიძლება უკავშირდებოდეს ეს? - ერთი, რომ მათ საერთოდ გადაეწურათ იმედი, რომ მათი პატრონები როგორღაც დაიხსნიან დამნაშავეებს ციხიდან და მეორე, რომ ეს იყო კარგად დაგეგმილი პროცესი და მედია კამპანია, რომელსაც ადამიანებში უნდა გამოეწვია შეცოდების გრძნობა“, - განაცხადა ნინო წილოსანმა.