უმრავლესობის წევრი ნარკოპოლიტიკის კანონპროექტზე განცხადებას ავრცელებს

საპარლამენტო უმრავლესობის წარმომადგენელი მირიან წიკლაური ნარკოპოლიტიკის რეფორმასთან დაკავშირებით საგანგებო განცხადებას ავრცელებს. დეპუტატის თქმით, ჯანდაცვის კომიტეტის სხდომა ისე ჩატარდა, რომ მას „ქართული ოცნების“ წევრთა უმრავლესობა არ დასწრებია და კვორუმი „ნაციონალური მოძრაობის“ დახმარებით შეავსეს.

„მიმაჩნია, რომ ახალი ნარკოპოლიტიკის შესახებ კანონპროექტი, რომელიც ინიცირებულია პარლამენტში, საქართველოში ნარკომანიის აფეთქებას გამოიწვევს. კანონპროექტის წარმოდგენილი ვარიანტი არ არის შეთანხმებული საპარლამენტო უმრავლესობასთან, არც კონსულტაციები გაგვივლია. ძალიან ბევრ კითხვაზე პასუხები არ არსებობს. ჯანდაცვის კომიტეტის სხდომაზე, „ქართული ოცნების“ უმრავლესობა პროტესტის ნიშნად არ შევედით, მიზეზი კი ის გახდა, რომ საკითხი უმრავლესობასთან შეთანხმებული არ ყოფილა. უფრო მეტიც, ჩემი ინფორმაციით, გუნდის უმრავლესობა, წარმოდგენილი ვარიანტის წინააღმდეგია“, - ამბობს დეპუტატი. 

პარლამენტის ჯანდაცვის კომიტეტმა ნარკოტიკების მოხმარების დეკრიმინალიზაციის საკანონმდებლო ინიციატივას პრინციპების დონეზე მხარი 27 დეკემბერს დაუჭირა. 

ინიციატივას მხარი დაუჭირა ხუთმა დეპუტატმა, მათ შორის, ოპოზიციის წარმომადგენლებმა, ხოლო კომიტეტის წევრები საპარლამენტო უმრავლესობიდან, რომლებიც აღნიშნულ ინიციატივას მხარს არ უჭერენ, სხდომას არ ესწრებოდნენ.

ნარკოპოლიტიკის შესახებ ჯანდაცვის კომიტეტის სხდომა 2 საათის დაგვიანებით დაიწყო. ამის მიზეზი კვორუმის არარსებობა იყო. კომიტეტის 6 წევრი, ნარკოლიბერალიზაციას მხარს არ უჭერს. ჯანდაცვის კომიტეტის თავმჯდომარე აკაკი ზოიძე კომიტეტის წევრებს დახურულ კარს მიღმა შეხვდა. მსჯელობა ხმაურის ფონზე მიმდინარეობდა.

10 დეკემბერს თბილისში, ქუთაისსა და ბათუმში ჰუმანური ნარკოპოლიტიკის მოთხოვნით მშვიდობიანი აქციები გაიმართა.

30 ნოემბერს საკონსტიტუციო სასამართლომ მარიხუანის მოხმარებაზე სისხლის სამართლის პასუხისმგებლობა გააუქმა, რაც იმას ნიშნავს, რომ მარიხუანის მოხმარება დეკრიმინალიზებულია.