ნარკოდანაშაულზე შეწყალების კომისიის დებულება შესაძლოა შეიცვალოს

შეწყალების კომისიის დებულება შესაძლოა შეიცვალოს და ნარკოდანაშაულისთვის მსჯავრდებულებთან დამოკიდებულება უფრო ლიბერალური გახდეს - ამის შესახებ ნარკოპოლიტიკის ეროვნული პლატფორმის წევრებთან შეხვედრის შემდეგ გახდა ცნობილი. შეხვედრას პრეზიდენტი, შეწყალების კომისიის თავმჯდომარე და პლატფორმის წარმომადგენლები ესწრებოდნენ:

"ჩვენ დღეს ვხედავთ, რომ საქართველოში მუშაობდა და მუშაობს ნარკოპოლიტიკა, რომლის შედეგიც უკეთესი, ყოველ შემთხვევაში სტატისტიკის მაჩვენებლით არ არის, რომელიც აუბედურებს ძალიან ბევრ ადამიანს, რომელიც სამართალდამცველების წინაშე აყენებს ძალიან პრობლემურ არჩევანს. ჩვენ ვხედავთ ჯგუფს, რომელიც მუშაობს უკეთეს, უფრო ჰუმანურ ნარკოპოლიტიკასთან დაკავშირებით, ჯგუფს, რომელიც თანამშრომლობს ჩვენ დეპუტატებთან, რომლებიც მოწოდებული უნდა იყვნენ, რომ უფრო ადეკვატური და ლოიალური ნარკოპოლიტიკის შესაბამისი კანონმდებლობა შექმნან. ძალიან მიხარია, რომ ჩვენს საზოგადოებაში განიხილავს ამ თემას,მიხარია, რომ ჩვენ ნელ-ნელა იმ სტერეოტიპებიდან გამოვდივართ, რომელიც სტიგმატიზაციას ახდენდა ჩვენი მოქალაქეების და შემიძლია ზოგადად ვუთხრა ყველას, როდესაც შენი პოლიტიკა უკეთეს შედეგს არ იძლევა, როდესაც ის აკრძალვები, სიმკაცრეები, რომელიც მოიფიქრე შედეგს არ გაძლევს, ჯობია, რომ ეს აკრძალვები მოხსნა", - განაცხადა გიორგი მარგველაშვილმა.

შეხვედრაზე გადაწყდა, რომ შეიქმნება სამუშაო ჯგუფი, რომელიც იანვრის დასაწყისში შეწყალების კომისიას შეხვდება. 

ნარკოდანაშაულზე შეწყალების კომისიის დებულება თეთრი ხმაურის მოძრაობისთვის ყველაზე პრიორიტეტული საკითხი იყო.

"ჩვენი მოთხოვნაა პრეზიდენტმა გვიშუამდგომლოს იმ პატიმრების გასათავისუფლებლად, რომლებიც ციხეში სხედან ამ ჯალათური ნარკოპოლიტიკის გამო. აქ საკითხი ნარკოპოლიტიკასაც სცდება, ზოგადად ქვეყანაში არის პოლიციური ტერორი", - განაცხადა ერეკლე დეისაძემ.

პარლამენტის ჯანდაცვის კომიტეტმა ნარკოტიკების მოხმარების დეკრიმინალიზაციის საკანონმდებლო ინიციატივას პრინციპების დონეზე მხარი 27 დეკემბერს დაუჭირა. 

ინიციატივას მხარი დაუჭირა ხუთმა დეპუტატმა, მათ შორის, ოპოზიციის წარმომადგენლებმა, ხოლო კომიტეტის წევრები საპარლამენტო უმრავლესობიდან, რომლებიც აღნიშნულ ინიციატივას მხარს არ უჭერენ, სხდომას არ ესწრებოდნენ.

10 დეკემბერს თბილისში, ქუთაისსა და ბათუმში ჰუმანური ნარკოპოლიტიკის მოთხოვნით მშვიდობიანი აქციები გაიმართა.

30 ნოემბერს საკონსტიტუციო სასამართლომ მარიხუანის მოხმარებაზე სისხლის სამართლის პასუხისმგებლობა გააუქმა, რაც იმას ნიშნავს, რომ მარიხუანის მოხმარება დეკრიმინალიზებულია.