პრეზიდენტი: რუსთაველის გამზირის მოვლენებისას სამოქალაქო დაპირისპირების საშიშროების წინაშე აღმოვჩნდით

პრეზიდენტმა გიორგი მარგველაშვილმა კიდევ ერთხელ შეაფასა 13 მაისს რუსთაველის გამზირზე განვითარებული მოვლენები. ამის შესახებ მას ტექნიკურ უნივერსიტეტში, სტუდენტებთან შეხვედრაზე ჰკითხეს. პრეზიდენტის შეფასებით, რუსთაველის გამზირზე განვითარებული მოვლენებისას არ იყო ის გადაწყვეტილებები მიღებული, რომელიც სიტუაციას განმუხტავდა. მის კომენტარს სააგენტო "ინტერპრესნიუსი" ავრცელებს.

გიორგი მარგველაშვილის მოსაზრებით, პოლიტიკური გადაწყვეტილებების წყებამ საზოგადოება სამოქალაქო დაპირისპირების საშიშროების წინაშე დააყენა.

"რეიდების დაწყებიდან იმ მომენტამდე ვიდრე რუსთაველზე აღმოვჩნდით სამოქალაქო დაპირისპირების საშიშროების წინაშე, დავინახეთ პოლიტიკური და ადმინისტრაციული გადაწყვეტილებების წყება, რომლებმაც რამდენიმე საათში ქვეყანა მიიყვანა სირთულემდე. რამდენიმე ნარკორეალიზატორის დაკავებიდან სულ რამდენიმე საათში მივედით იმ რეალობამდე, როდესაც ქალაქის ცენტრში გარკვეულმა ჯგუფებმა განაცხადეს, რომ მათ აქვთ უფლება სიტუაციის კონტროლის და რომ ისინი გააკონტროლებენ ქუჩას, კონსტიტუციას და ვინ რას იტყვის და ილაპარაკებს. ამ დინამიკას თუ შევხედავთ, დავინახავთ რამდენად ბევრი შეცდომა იქნა დაშვებული. არ იყო მიღებული ის გადაწყვეტილებები, რომელიც სიტუაციას განმუხტავდა. ჩვენ ემოციურად ვუყურებთ ხოლმე ამ პროცესებს - ამან ეს თქვა, იმას ეს ეცვა, ის ამას ჟესტიკულირებდა. ნარკორეალიზატორის დაკავება არის ყოველდღიური რუტინა, არ არის პრობლემური თემა, თუმცა ამ თემიდან მივედით იმ მომენტამდე, როდესაც რუსთაველზე საჭირო გახდა რაღაც პროცესების წარმართვა. რა თემაა და რა პრობლემაა 8, 10-ის ან 20 ნარკორეალიზატორის დაკავება, რომ ამან საზოგადოება მიიყვანოს ასეთ დრამატიზმამდე. მთელი საზოგადოება იყო შეძრწუნებული იმით, რომ არ დავხოცოთ ერთმანეთი. შეიძლება უცებ მივიდეთ ასეთ კრიზისამდე“, - განაცხადა პრეზიდენტმა. 

თბილისში 12-13 მაისს თეთრი ხმაურის მოძრაობამ და ახალგაზრდებმა აქციები მას შემდეგ დაიწყეს, რაც 11 მაისის ღამეს, თბილისის ღამის კლუბებში შსს-მ სპეცოპერაციები ჩაატარა. შედეგად 8 ნარკორეალიზატორი დააკავეს, თუმცა ახალგაზრდებმა სამართალდამცველების მიერ კლუბებში ძალის გადამეტების გამო აქციები იმ ღამესვე გამართეს.

პარალელურად მიმდინარეობდა კონტრაქციაც, რომელსაც მალევე ქართული მარში შეუერთდა. თხმ-ის აქციის დასრულების მიუხედავად, ნეონაცისტური ჯგუფები პარლამენტის ტერიტორიას არ ტოვებდნენ.

ამასთან, მთელი დღის განმავლობაში მათსა და პოლიციას შორის, რომელიც თეთრი ხმაურის აქციას იცავდა, სიტყვიერი და ფიზიკური დაპირისპირება რამდენჯერმე მოხდა - ისინი პოლიციის კორდონის გარღვევას ცდილობდნენ. პოლიციამ 10-მდე ადამიანი წინააღმდეგობის გაწევისთვის დააკავა. ისინი მეორე დღეს ხელწერილის საფუძველზე გათავისუფლდნენ.