საფინანსო-საბიუჯეტო კომიტეტმა მხარი დაუჭირა საკანონმდებლო ცვლილებას, რომელიც ზედმეტად გაცემული სახელმწიფო კომპენსაციის ლეგალიზაციას ითვალისწინებს

პარლამენტის საფინანსო-საბიუჯეტო კომიტეტმა პირველი მოსმენით განიხილა მთავრობის მიერ საკანონმდებლო ინიციატივის წესით წარდგენილი კანონპროექტი „სახელმწიფო კომპენსაციისა და სახელმწიფო აკადემიური სტიპენდიის შესახებ“ საქართველოს კანონში ცვლილების შეტანის თაობაზე“, თანმდევ პროექტებთან ერთად.

კანონპროექტის თანახმად, 2025 წლის 1 ნოემბრამდე ზედმეტად გაცემული სახელმწიფო კომპენსაცია ლეგალიზებულად ჩაითვლება და უკან დაბრუნებას არ დაექვემდებარება.

ამასთან, შეწყდება ადმინისტრაციული, სასამართლო და სააღსრულებო წარმოებები ლეგალიზებული კომპენსაციის დაბრუნების თაობაზე საქმეებზე.

როგორც მომხსენებელმა, საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრის მოადგილე ირინე წაქაძემ განაცხადა, ზედმეტად გაცემული თანხების ლეგალიზაცია შეეხება: პენსიის მიმღებ 1600-ზე მეტ პენსიონერს, სახელმწიფო კომპენსაციის მიმღებ 250-ზე მეტ პირს, სოციალური პაკეტის მიმღებ 304 პირს და საარსებო შემწეობის მიმღებ 1400-ზე მეტ ოჯახს.

„რაც შეეხება თანხებს, სახელმწიფო პენსიის შემთხვევაში ის 1 200 000 ლარზე მეტია, სახელმწიფო კომპენსაციის შემთხვევაში - 600 000 ლარი, სოციალური პაკეტის შემთხვევაში - დაახლოებით 130 000 ლარი, ხოლო საარსებო შემწეობის შემთხვევაში - 2 600 000 ლარი. მთლიანად ეს თანხა 4 500 000 ლარს შეადგენს“, - აღნიშნა ირინე წაქაძემ.

დღევანდელ სხდომაზე საფინანსო-საბიუჯეტო კომიტეტმა 16 თებერვალს, კომიტეტთან არსებული სახელმწიფო აუდიტის სამსახურის ანგარიშების განმხილველი მუდმივმოქმედი აუდიტის ჯგუფის სხდომაზე მიღებული გადაწყვეტილებები დაამტკიცა. აუდიტის ჯგუფმა სხდომაზე სახელმწიფო აუდიტის სამსახურის მიერ წარდგენილი განრიდება-მედიაციის პროგრამის ეფექტიანობის აუდიტის ანგარიში და საქართველოს ადამიანური კაპიტალის პროგრამის სპეციალური დანიშნულების ფინანსური ანგარიშგების აუდიტის ანგარიში განიხილა.