ვოლსკი: აფგან მუხტარლი სკანდალური განცხადებებით ყურადღებას იქცევს

აფგან მუხტარლი ფიქრობს, რომ რაც უფრო სკანდალური იქნება მისი განცხადებები, უფრო მეტ ყურადღებას მიიქცევს, – ამის შესახებ პარლამენტის ვიცესპიკერმა გია ვოლსკიმ განაცხადა.

მისი თქმით, მუხტარლი თავად საკმაოდ მძიმე მდგომარეობაშია იმ წაყენებული ბრალდებების ფონზე, რომელიც აზერბაიჯანულმა სასამართლომ წაუყენა.

,,ამ რთულ მდგომარეობაში ჩავარდნილ ადამიანს მნიშვნელოვნად სჭირდება, როგორც თვითონ გეგმავს, საერთაშორისო ყურადღება. რაც უფრო სკანდალური იქნება მისი განცხადება, თვითონ ფიქრობს, რომ მეტ ყურადღებას მიიქცევს. რასაკვირველია, არც პრემიერი, არც ყოფილი პრემიერი ამ საქმესთან არანაირ კავშირში არ შეიძლება იყვნენ. იგი წლების განმავლობაში ცხოვრობდა საქართველოში, საკმაოდ კომფორტულ ვითარებაში და არანაირი პრობლემა მის ჟურნალისტურ საქმიანობას არ შექმნია. თუმცა, არც ამ ჟურნალისტური საქმიანობის შესახებ რომელიმე აქ მყოფს გაუგია ძალიან ბევრი”,- აცხადებს უმრავლესობის წევრი.

დღესვე აფგან მუხტარლის საქმეზე ადვოკატმა მთავარ პროკურატურას სპეციალური განცხადებით მიმართა. არჩილ ჩოფიკაშვილი ელოდება პროკურატურისგან რეაგირებას.

აფგან მუხტარლი ციხიდან ორი დღით გაათავისუფლეს, რათა დაღუპული ოჯახის წევრების ორმოცს დასწრებოდა. ჟურნალისტმა ინტერვიუ მისცა აზერბაიჯანულ და ქართულ მედიას. ის ფიქრობს, რომ მისივე თქმით, მასზე თვალთვალი გატაცებამდე ორი თვით ადრე დაიწყო. მუხტარლის ეჭვი აქვს, რომ მისი გატაცებით ქართულმა მხარემ და კონკრეტულმა პირებმა ფინანსური სარგებელი მიიღეს. 

აზერბაიჯანელ ჟურნალისტს და უფლებადამცველს, აფგან მუხტარლის, რომელიც 29 მაისს თბილისში გაუჩინარდა, აზერბაიჯანის სასამართლომ საზღვრის უკანონოდ გადაკვეთის, საზღვარზე 10,000 ევროს არადეკლარირებულად გადატანასა და მესაზღვრისთვის წინააღმდეგობის გაწევის გამო, 6 წლით თავისუფლების აღკვეთა მიუსაჯა.

საქართველოში მუხტარლის საქმეზე შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.