თეთრი ხმაური ვარაუდობს, რომ ნარკოპოლიტიკის კანონპროექტი შეიცვლება

თეთრი ხმაურის მოძრაობა პარლამენტში ნარკოპოლიტიკის კანონპროექტის განხილვის კიდევ ერთხელ გადადებას ეხმიანება.

მოძრაობა არ გამორიცხავს, რომ სამი კვირის შემდეგ ნარპოლიტიკის ლიბერალიზაციის შესახებ კანონპროექტი პარლამენტს სახეშეცვლილი დაუბრუნდეს.

"ნორმალური სახელმწიფო და ქვეყანა რომ ვიყოთ, პარლამენტს ამ კანონის განხილვა დასრულებული უნდა ჰქონდეს, რადგან 1 წელზე მეტია ეს ინიციატივა პარლამენტში თაროებზე ცხოვრობს. ამჯერად სამკვირიანი გადადება არ არის პრობლემატური, პრობლემაა ის დიდი სურათი რაც გვაქვს. პრობლემა ისაა, თუ რას აპირებს ხელისუფლება. გვაქვს განცდა, რომ შეთავაზებული რეფორმიდან იქნება გადახვევები", - აცხადებს დავით სუბელიანი.

მისი თქმით, დღეს სახელმწიფოს სჭირდება მარტივი რამ: ნარკოტიკების მომხმარებლები გამოვიდნენ სისხლის სამართლის დევნიდან. "სახელმწოფს აქვს შიში, მათ არ უნდათ დაკარგონ კონტროლი, რომელსაც ნარკოპოლიტიკით ეფექტურად იყენებენ ხალხზე", - აცხადებს სუბელიანი.

ოპოზიციაში მიაჩნიათ, რომ "ქართული ოცნება" მიზანმიმართულად იკავებს თავს ნარკოპოლიტიკის ლიბერალიზაციის მიმართულებით ნაბიჯების გადადგმისგან.

როგორც ჟურნალისტებს ევროპული საქართველოს წევრმა ზურაბ ჭიაბერაშვილმა განუცხადა, საზოგადოებაში არის მკაფიოდ ჩამოყალიბებული პოზიცია, იმასთან დაკავშირებით რომ ნარკოპოლიტიკა შესაცვლელია ორი მიმართულებით.

"პირველი მოხმარებისთვის ადამიანი ციხეში არ უნდა მიდიოდეს,მაგრამ ამავდროულად უნდა გადაიგას ნაბიჯები რომ არ გაიზარდოს ნარკომომხმარებელთა რაოდენობა. ამ ორი პირობისთვის მზაობა არსებობს, მაგრამ ქართული ოცნება ფეხს ითრევს, რომ გადადგას ამ მიმართულებით რაც აუცილებელია თუნდაც იმიტომ რომ დაიწყოს შესაბამისი ჯანდაცვისა და სოციალური რეაბილიტაციის პროგრამები", - თქვა ჭიაბერაშვილმა.

ნარკოპოლიტიკის კანონპროექტის შესახებ მსჯელობა იურიდიულ საკითხთა კომიტეტის თავმდჯომარის ეკა ბესელიას თხოვნით კიდევ სამი კვირით გადაიდო.

პარლამენტის ჯანდაცვის კომიტეტმა ნარკოტიკების მოხმარების დეკრიმინალიზაციის საკანონმდებლო ინიციატივას პრინციპების დონეზე მხარი გასული წლის 27 დეკემბერს დაუჭირა. თუმცა მას შემდეგ კანონპროექტის განხილვა რამდენჯერმე გადაიდო. ცნობილია, რომ უმრავლესობის ნაწილი ნარკოპოლიტიკის კანონპროექტის მხარდაჭერას არ აპირებს. 

17 იანვარს ნარკოპოლიტიკის შეცვლის გაჭიანურებასთან დაკავშირებით განცხადება შს მინისტრმა გიორგი გახარიამაც კი გააკეთა და თქვა, რომ ნარკოპოლიტიკაზე გადაწყვეტილების მიღების პროცესის დროში გაჭიანურება "უკურეაქციას გვაძლევს".

30 ნოემბერს საკონსტიტუციო სასამართლომ მარიხუანის მოხმარებაზე სისხლის სამართლის პასუხისმგებლობა გააუქმა, რაც იმას ნიშნავს, რომ მარიხუანის მოხმარება დეკრიმინალიზებულია.

2017 წლის 26 ივლისს პარლამენტმა მესამე მოსმენით განიხილა და მხარი დაუჭირა საკანონმდებლო პაკეტს, რომლითაც მარიხუანასა და მცენარე კანაფთან დაკავშირებით კანონის ლიბერალიზაცია იგეგმება. 2017 წლის 29 ივლისს მარიხუანის მცირე ოდენობით მოხმარებისთვის პატიმრობის გაუქმებაზე ნორმა ძალაში შევიდა.