აბაშიშვილი: ამ ეტაპზე, ვიზალიბერალიზაციის შეჩერების მექანიზმის ამოქმედების რისკი არ არსებობს

პრეზიდენტის ადმინისტრაციის უფროსი გიორგი აბაშიშვილი მიიჩნევს, რომ ამ დროისთვის, ვიზალიბერალიზაციის შეჩერების მექანიზმის ამოქმედების რისკი არ არსებობს. ამის შესახებ 1tv-ი წერს.

როგორც აბაშიშვილმა ნატო-სა და ევროკავშირის შესახებ საინფორმაციო ცენტრში განაცხადა, საქართველოს თითოეულმა მოქალაქემ უნდა გააცნობიეროს, რომ ვიზალიბერალიზაცია ამავე დროს, დიდი პასუხისმგებლობაა.

„ყოველთვის, როდესაც ევროპაში ინფორმაცია ვრცელდება საქართველოს მოქალაქეების შესახებ, კრიმინალთან დაკავშირებული და ა.შ, ძალიან ყურადღებით უნდა დავაკვირდეთ ამ ინფორმაციის წარმომავლობის წყაროს. ჩვენ უნდა გვახსოვდეს, მათ შორის ეს ყოველთვის ყველა ინფორმაციას არ ეხება, რომ საქართველოს რუსეთის სახით დიდი პროპაგანდისტული მტერი ჰყავს, რომელიც ხშირ შემთხვევაში, ალბათ, საქართველოს შესახებ ნეგატიური ინფორმაციის გავრცელებას დიდი სიამოვნებით ეცდება, მათ შორის ვიზალიბერალიაციის პროცესში, რომლითაც ჩვენი მეზობელი ბედნიერი სულაც არ არის. ეს ფაქტორი არსებობს, ამ ფაქტორის იგნორირება უბრალოდ არ შეიძლება“, – განაცხადა აბაშიშვილმა.

საქართველოს პრეზიდენტის ადმინისტრაციის უფროსის განცხადებით, ვიზალიბერალიზაცია უმნიშვნელოვანესი სარგებელია და დიდი სიფრთხილეა საჭირო.

საქართველოსთვის ვიზალიბერალიზაციის შეჩერების მექანიზმის შესაძლო ამოქმედებასთან დაკავშირებული პრობლემა დღის წესრიგში ევროკომისიის დასკვნის შემდეგ დადგა.

ვიზალიბერალიზაციის ამოქმედებიდან 10 თვის შემდეგ საქართველომ პირველი გაფრთხილება მიიღო. მთავარ გამოწვევად თავშესაფრის მაძიებელთა რაოდენობის ზრდა დასახელდა.

2016 წელს თავშესაფრის მისაღებად განაცხადი 625-მა მოქალაქემ შეავსო, 2017 წელს კი მსურველთა რაოდენობა - 1570-მდე გაიზარდა. ქართველებისთვის ყველაზე სასურველ ქვეყნებს შორის შვედეთი და ისლანდია მოხვდა.

პრობლემად ისევ დასახელდა ორგანიზებულ დანაშაულში ქართველების მონაწილეობა. ქურდობა და ყაჩაღობა განსაკუთრებით ხშირია: საფრანგეთში, გერმანიაში, იტალიაში, საბერძნეთსა და ესპანეთში. ამ ფონზე საქართველოს მთავრობა სანქციების გამკაცრებაზე დაფიქრდა. მთავრობის წევრები მოქალაქეებს ამ მონაპოვარის გაფრთხილებისკენ მოუწოდებენ.