ლევან ბოძაშვილი: თავშესაფრის მაძიებლის განაცხადის დაკმაყოფილების შანსი 2 ათასში 80-ია

უშიშროების საბჭოს მდივნის ყოფილი მოადგილის ლევან ბოძაშვილის თქმით, თავშესაფრის მაძიებლებმა უნდა იცოდნენ, რომ მათი განაცხადის დაკმაყოფილების შანსი 2 ათასში 80-ია. ინფორმაციას სააგენტო "ინტერპრესნიუსი" ავრცელებს.

ბოძაშვილის განმარტებით, ეს შანსი კიდევ უფრო მცირდება იმ ქვეყნებში, სადაც საქართველო უსაფრთხო ქვეყნად არის მიჩნეული. მისი თქმით, 2017 წელს თავშესაფრის მოთხოვნით ევროკავშირს 147 ქვეყნის 1.2 მილიონმა ადამიანმა მიმართა, მათგან ყველაზე მეტი სირიაზე, ერაყზე და ავღანეთზე მოდის.

"ევროკავშირის ქვეყნებში 2017 წლის ბოლო 2 კვარტალში 202 700 პირველი ინსტაციის სასამართლო გადაწყვეტილება იქნა გამოტანილი. აქედან თავშესაფრის აპლიკაციების 46% დაკმაყოფილდა. აქედან ყველაზე მეტი გერმანიაზე (90 900), საფრაგეთზე (30 500), იტალიაზე (18400), შვედეთზე (15 500), ავსტრიაზე (14700) და საბერძნეთზე (6900) მოდის.

დაკმაყოფილებულ აპლიკაციათა სტატისტიკა სხვა ქვეყნებიდან მიმართვებზე ყოველი 2000 განაცხადიდან ასეთია: მაკედონია - 2 %, სერბეთი - 3 %, საქართველო - 4 %, ალჟირი - 8%.

ეს ნიშნავს, რომ თუ ამ მიზნით მიდის ადამიანი, მანდ უნდა იცოდეს, რომ მისი განაცხადის დაკმაყოფილების შანსი ყოველ 2 ათას ადამიანზე 80-ში მოხვედრის ტოლფასია. ხოლო ეს შანსი კიდევ უფრო მცირდება იმ ქვეყნებში, სადაც საქართველო უსაფრთხო ქვეყნად არის მიჩნეული. ამიტომ, კარგი იქნება თუ გაკეთდება რაიმე პორტალი, ოფისი, სადაც ადამიანებს უფასოდ აუხსნიან თავშესაფრის პროცედურებს, მათ შედეგებსა და სავარაუდო ფინანსურ თუ სხვა დანახარჯებსა და სანქციებს, რომლის დაწესებაც იგეგმება. სულ ერთი რეგულაციაა, ერთი დირექტივა და ერთიც პროცედურა. ითარგმნოს და დარიგდეს ან დაიდოს სადმე, რომ ადამიანებმა იცოდნენ, რას რისკავენ და რა შანსები აქვთ ამ რეგულაციების გავლის. აბსოლუტური უმრავლესობა ვიღაცის მონაყოლზე მიდის. იქნებ ბევრმა გადაიფიქროს კიდეც“, - აცხადებს ბოძაშვილი.

საქართველოსთვის ვიზალიბერალიზაციის შეჩერების მექანიზმის შესაძლო ამოქმედებასთან დაკავშირებული პრობლემა დღის წესრიგში ევროკომისიის დასკვნის შემდეგ დადგა. ვიზალიბერალიზაციის ამოქმედებიდან 10 თვის შემდეგ საქართველომ პირველი გაფრთხილება მიიღო. მთავარ გამოწვევად თავშესაფრის მაძიებელთა რაოდენობის ზრდა დასახელდა. 2016 წელს თავშესაფრის მისაღებად განაცხადი 625-მა მოქალაქემ შეავსო, 2017 წელს კი მსურველთა რაოდენობა - 1570-მდე გაიზარდა. ქართველებისთვის ყველაზე სასურველ ქვეყნებს შორის შვედეთი და ისლანდია მოხვდა. პრობლემად ისევ დასახელდა ორგანიზებულ დანაშაულში ქართველების მონაწილეობა. ქურდობა და ყაჩაღობა განსაკუთრებით ხშირია: საფრანგეთში, გერმანიაში, იტალიაში, საბერძნეთსა და ესპანეთში. ამ ფონზე საქართველოს მთავრობა სანქციების გამკაცრებაზე დაფიქრდა. მთავრობის წევრები მოქალაქეებს ამ მონაპოვარის გაფრთხილებისკენ მოუწოდებენ.