დაკავებულ დეკანოზ გიორგი მამალაძეს დღეს ადვოკატი შეხვდება

დაკავებულ დეკანოზს გიორგი მამალაძეს მისი ადვოკატი გიორგი ფანცულაია დღეს, დღის პირველ ნახევარში შეხვდება. ადვოკატისთვის ჯერჯერობით უცნობია, დაარღვევს თუ არა გიორგი მამალაძე დუმილის უფლებას. როგორც გიორგი ფანცულაიამ განაცხადა, ხელისუფლების წარმომადგენლები  პროკურატურის თავდაპირველი განცხადებით შეცდომაში შეიყვანეს. მისი თქმით, ამ ეტაპზე მმართველი გუნდის წარმომადგენლებმა წინა დღეებში დაფიქსირებული პოზიცია ოდნავ შეარბილეს და  ფანცულაიას იმედი აქვს, რომ გამოძიება რეალურად დაინტერესდება ჩაიდინა თუ არა მამა გიორგიმ დანაშაული. 

„ირონიის მომგვრელია ის, რომ პროკურატურა იყო შეცდომაში შეყვანილი. პროკურატურის თანამშრომლები თავად იძიებენ ამ საქმეს და როგორ უნდა იყვნენ შეცდომაში შეყვანილი, არ ვიცი. პირიქით, მე ვფიქრობ, რომ პროკურატურის განცხადებების საფუძველზე შევიდნენ პოლიტიკოსებიც და საზოგადოებაც შეცდომაში", - ამბობს გიორგი ფანცულაია პროკურატურის მიერ გუშინ გავრცელებული განცხადების საპასუხოდ. 

საქართველოს მთავარმა პროკურატურამ დეკანოზის საქმესთან დაკავშირებით სპეციალური განცხადება გაავრცელა.

განცხადების თანახმად, დღეს მედიასაშუალებებში დეკანოზ გიორგი მამალაძის ბრალდების სისხლის სამართლის საქმესთან დაკავშირებით გავრცელებული ინფორმაცია პროკურატურის მიერ გაკეთებული განცხადების გარკვეულ ინტერპრეტაციას წარმოადგენს.

მთავარი პროკურატურის პრესსამსახურის უფროსის, ნათია სუხიაშვილის თქმით, 13 თებერვალს, მთავარი პროკურორის მიერ დეკანოზის საქმესთან დაკავშირებით გაკეთებული განცხადება ხელისუფლების წარმომადგენლებმა, სასულიერო პირებმა და საზოგადოებამ არასწორად გაიგეს.