პროკურატურა: პროკურორს არ უხსენებია პატრიარქის ან მაღალი იერარქიის სასულიერო პირის მკვლელობა

მთავარი პროკურატურის პრესსამსახურის უფროსი ნათია სუხიაშვილის განცხადებით, მთავარ პროკურორ ირაკლი შოთაძეს, დეკანოზის საქმესთან დაკავშირებით გამართულ ბრიფინგზე, არ უხსენებია, რომ პატრიარქის ან რომელიმე მაღალი იერარქიის სასულიერო პირის მკვლელობა იგეგმებოდა.

სუხიაშვილის თქმით, პროკურატურის განცხადება ხელისუფლების წარმომადგენლებმა, სასულიერო პირებმა და საზოგადოებამ არასწორად გაიგეს. ამის შესახებ პროკურატურის პრესსამსახურის უფროსი გაზეთ "რეზონანსთან" ინტერვიუში საუბრობს.

"ბრიფინგზე მთავარ პროკურორს ჰკითხეს, იყო თუ არა მაღალი იერარქიის სასულიერო პირი ილია მეორე, ირაკლი შოთაძემ უპასუხა, რომ - არა, მე პატრიარქი არსად მიხსენებია. ჩვენ პრესრელიზში, თუ კარგად წაიკითხავთ, წერია, რომ განმცხადებელმა, რომელიც პროკურატურაში მოვიდა, თქვა, რომ უნდა მოეხდინათ მაღალი იერარქიის სასულიერო პირის სიცოცხლის ხელყოფა. ჩვენ ციტატა მისი განცხადებიდან მოვიყვანეთ, თორემ უკვე მეოთხე აბზაცში წერია ის, რაც გამოძიებით დადგინდა - ანუ, იგეგმებოდა ერთ-ერთი პირის მკვლელობა პატრიარქის გარემოცვიდან და აქ საუბარი არ არის მაღალი იერარქიის წარმომადგენელზე. უბრალოდ განცხადება კარგად არის წასაკითხი. თუმცა არ ვიცი, რატომღაც ასე აიტაცეს და გადაწყვიტეს. "გამოძიებით დადგინდა"-ში რაც წერია, ესაა მნიშვნელოვანი," - აცხადებს სუხიაშვილი.

საქართველოს მთავარმა პროკურორმა ირაკლი შოთაძემ დეკანოზის საქმესთან დაკავშირებით საგანგებო ბრიფინგი 10 თებერვალს გამართა. ბრიფინგზე მთავარმა პროკურორმა არც დაადასტურა და არც უარყო, რომ დეკანოზი პატრიარქის მკვლელობას ამზადებდა. "ამ ეტაპზე რაც დგინდება, ანგარებითი მოტივია", - დასძინა შოთაძემ.