უმრავლესობა ნარკოპოლიტიკის კანონპროექტის შესახებ პრემიერს შეხვდება

საპარლამენტო უმრავლესობა ნარკოპოლიტიკის ლიბერალიზაციის შესახებ მომზადებულ საკანონმდებლო ცვლილებებთან დაკავშირებით, პრემიერმინისტრ გიორგი კვირიკაშვილთან შეხვედრას აპირებს. ამის შესახებ ჯანდაცვის კომიტეტის თავმჯდომარემ აკაკი ზოიძემ თქვა. ინფორმაციას 1tv ავრცელებს.

პარლამენტის პლენარულ სხდომაზე ცვლილებების პირველი მოსმენით განხილვა მარტის ბოლომდე იგეგმება, მანამდე კი, დაინტერესებულ მხარეებთან შეხვედრები გაიმართება, მათ შორის პრემიერმინისტრთან.

ზოიძის თქმით, უმრავლესობის ლიდერის არჩილ თალაკვაძის ორგანიზებით, ცვლილებების თაობაზე პოზიციები უკვე გამოიკვეთა როგორც მომხრეების, ასევე, მოწინააღმდეგეების მხრიდან.

"გარკვეული კონტურები გამოიკვეთა იმ საკამათო თემებზე, რაც ეხება ზღვარს და საკითხს პატიმრობის გაუქმების შემთხვევაში, ალტერნატიული სასჯელის რა მექანიზმები უნდა იყოს იმისთვის, რომ ნარკომოხმარება არ წახალისდეს. პოზიციები იმაზეც შეჯერდა რა თანხები დასჭირდება ახალ სერვისებს. ველოდებით, რომ უახლოესი ათი დღის განმავლობაში პრემიერთან შეხვედრა გაიმართოს, რის შემდეგაც შეხვედრები საზოგადოების სხვადასხვა ჯგუფებთან შედგება, მათ შორის სასულიერო პირებთან. შემდეგ საკითხზე იურიდიულ კომიტეტში ვიმსჯელებთ. პირველი მოსმენით კი, ცვლილებებს მარტის განმავლობაში მივიღებთ", – აღნიშნავს ზოიძე.

დეპუტატი საკითხთან დაკავშირებით, „კონსერვატორების“ პოზიციასაც ეხმაურება და აცხადებს, რომ ისინი ნარკომოხმარებაზე სისხლის სამართლის პასუხისმგებლობის მოხსნას არ ეთანხმებიან.

„პოზიციები პრემიერთან შეჯერდება. ჩვენი ლიდერი პრემიერია და უმრავლესობის შეჯერებული პოზიცია, პრემიერთან შეჯერებას ნიშნავს. ეს შეხვედრა ყველა მონაწილე მხარესთან იქნება", - თქვა ზოიძემ.

ნარკოპოლიტიკის კანონპროექტის შესახებ მსჯელობა იურიდიულ საკითხთა კომიტეტის თავმდჯომარის ეკა ბესელიას თხოვნით კიდევ რამდენიმე კვირით გადაიდო.

პარლამენტის ჯანდაცვის კომიტეტმა ნარკოტიკების მოხმარების დეკრიმინალიზაციის საკანონმდებლო ინიციატივას პრინციპების დონეზე მხარი გასული წლის 27 დეკემბერს დაუჭირა. თუმცა მას შემდეგ კანონპროექტის განხილვა რამდენჯერმე გადაიდო. ცნობილია, რომ უმრავლესობის ნაწილი ნარკოპოლიტიკის კანონპროექტის მხარდაჭერას არ აპირებს. 

2017 წლის 26 ივლისს პარლამენტმა მესამე მოსმენით განიხილა და მხარი დაუჭირა საკანონმდებლო პაკეტს, რომლითაც მარიხუანასა და მცენარე კანაფთან დაკავშირებით კანონის ლიბერალიზაცია იგეგმება. 2017 წლის 29 ივლისს მარიხუანის მცირე ოდენობით მოხმარებისთვის პატიმრობის გაუქმებაზე ნორმა ძალაში შევიდა.