ფოფხაძე ბორჯომის საკრებულოს არჩევნების ხელახალი ჩატარების ინიციატივით გამოდის

ბორჯომის მაჟორიტარი დეპუტატი გედევან ფოფხაძე ბორჯომის მუნიციპალიტეტში შექმნილი პოლიტიკური კრიზისიდან გამოსასვლელად საკრებულოს ხელახალი არჩევნების ჩატარების იდეით გამოდის. ინფორმაციას 1tv ავრცელებს.

ფოფხაძე ბორჯომის საკრებულოში დღეს განვითარებულ პროცესებს გამოეხმაურა და აღნიშნა, რომ სამწუხაროდ, ბორჯომის საკრებულოში ფიზიკური დაპირისპირება ახალი არ არის.

„მსგავსი სამწუხარო ფაქტები წინა მოწვევის საკრებულოშიც ხდებოდა. ამ ყველაფრის ცენტრში გიუაშვილი იყო. წინა მოწვევის საკრებულოში, მოქმედმა თავმჯდომარემ ჩაჩანიძემ გიუაშვილის გალახვა დაგეგმა. ახლა ერთად არიან, რაც არსებული ფონის გათვალისწინებით ბუნებრივად მიმაჩნია, რადგან ადამიანები სხვა ფორმას ვერ ნახულობენ თუ არა, ფიზიკურ დაპირისპირებასა და შეურაცხყოფას. “ლეიბორისტები” “პატრიოტთა ალიანსი” და “ნაციონალური მოძრაობა” ერთად ერთადერთი მიზნით დადგა, რომ “ქართულ ოცნებას” შანტაჟი და საბოტაჟი მოუწყოს, რათა ვერაფერი გავაკეთოთ. ეს მუნიციპალიტეტსა და მოსახლეობას აზარალებს. შეიძლება სხვადასხვა გამოსავალი მოიძებნოს, მაგრამ შეიძლება ერთ-ერთი გამოსავალი ხელახალი, ახალი არჩევნების ჩატარება იყოს”, – განაცხადა ფოფხაძემ.

დღეს ბორჯომის საკრებულოში "ქართული ოცნებისა" და ოპოზიციის დეპუტატები და მერიის წარმომადგენლები ფიზიკურად დაუპირისპირდნენ ერთმანეთს. 

ადგილობრივი თვითმმართველობის არჩევნების შემდეგ ბორჯომის საკრებულო დღეს პირველად შეიკრიბა. არაერთი მცდელობის შემდეგ კვორუმი შედგა, თუმცა საკრებულომ ვერც დღეს მოახერხა ბორჯომის მერიის საშტატო ნუსხისა და გაზრდილი ხელფასების დამტკიცება, რასაც პოლიტიკურ მხარეებს შორის უკმაყოფილება სიტყვიერი დაპირისპირება მოჰყვა.

ბორჯომის საკრებულოს ახალმა შემადგენლობამ დღემდე ვერც ერთი სხდომა ვერ გამართა ისე, რომ ყველა დეპუტატი დასწრებოდა. კვორუმის არარსებობის გამო წინა სხდომებიც ჩაიშალა. შესაბამისად, ვერ მტკიცდება ხელფასები, რის გამოც თვითმმართველობის 125 თანამშრონელს წელს ხელფასი არ აუღია.

უმრავლესობაში მყოფი ოპოზიციური პარტიები მერიას საშტატო ნუსხასა და ხელფასების გაზრდილ ოდენობას არ უმტკიცებენ. მმართველი გუნდი კი საკრებულოს სხდომებს პროტსტის ნიშნად არ ესწრებოდა.