ბორჯომის საკრებულოში მორიგი ფიზიკური დაპირისპირება მოხდა

ბორჯომის საკრებულოში „ნაციონალური მოძრაობის“ ერთ-ერთ ლიდერ ნიკა მელიასა და საკრებულოში მყოფ პირებს შორის ფიზიკური დაპირისპირება მოხდა. ამის შესახებ სააგენტო "ინტერპრესნიუსი" წერს.

არსებული ინფორმაციით, დაპირისპირებაში ბორჯომის მერიის თანამშრომლებიც მონაწილეობდნენ. დაპირისპირება მას შემდეგ დაიწყო, რაც „ნაციონალური მოძრაობის“ ლიდერი საკრებულოს შენობაში მივიდა. მერიის თანამშრომლებმა, მას შენობის დატოვება მოსთხოვეს და ხელისუფლებაში ყოფნის პერიოდი შეახსენეს. 

„ბორჯომში ხდება ის, რაც არასოდეს არსად მომხდარა. ბორჯომის საკრებულო არის ერთადერთი, რომელიც „ქართულმა ოცნებამ“ მისი სურვილისამებრ ვერ დაკომპლექტა. ოპოზიციურმა გაერთიანებამ, რომელმაც დააკომპლექტა აქ უმრავლესობა, უარი უთხრა „ქართული ოცნების“ აქტივს, რომელიც დასაქმებულია ბორჯომის მერიაში, რომ მათ გაუორმაგდეთ ხელფასი" - განაცხადა ნიკა მელიამ.

„ნაციონალური მოძრაობის“ ლიდერი პრემიერ-მინისტრს მოუწოდებს, რომ დაუყოვნებლივ ჩავიდეს ბორჯომში, ვინაიდან მელიას შეფასებით, იქ არსებული ვითარება ფეთქებადსაშიშია. 

ბორჯომის საკრებულოში დღეს კიდევ ერთი დაპირისპირება მოხდა.

ადგილობრივი თვითმმართველობის არჩევნების შემდეგ ბორჯომის საკრებულო დღეს პირველად შეიკრიბა. არაერთი მცდელობის შემდეგ კვორუმი შედგა, თუმცა საკრებულომ ვერც დღეს მოახერხა ბორჯომის მერიის საშტატო ნუსხისა და გაზრდილი ხელფასების დამტკიცება, რასაც პოლიტიკურ მხარეებს შორის უკმაყოფილება სიტყვიერი დაპირისპირება მოჰყვა.

ბორჯომის საკრებულოს ახალმა შემადგენლობამ დღემდე ვერც ერთი სხდომა ვერ გამართა ისე, რომ ყველა დეპუტატი დასწრებოდა. კვორუმის არარსებობის გამო წინა სხდომებიც ჩაიშალა. შესაბამისად, ვერ მტკიცდება ხელფასები, რის გამოც თვითმმართველობის 125 თანამშრონელს წელს ხელფასი არ აუღია.

უმრავლესობაში მყოფი ოპოზიციური პარტიები მერიას საშტატო ნუსხასა და ხელფასების გაზრდილ ოდენობას არ უმტკიცებენ. მმართველი გუნდი კი საკრებულოს სხდომებს პროტსტის ნიშნად არ ესწრებოდა.