ჟენევის თანათავმჯდომარეებთან შეხვედრას გადამდგარი ჯიოევი ესწრება

ცხინვალში ჟენევის თანათავმჯდომარეებსა და ოკუპირებული ცხინვალის წარმომადგენლებს შორის დისკუსია დაიწყო. შეხვედრას მურატ ჯიოევი ესწრება, რომელიც გუშინ გავრცელებული ინფორმაციის თანახმად, ე.წ. პრეზიდენტის წარმომადგენლის თანამდებობაზე უკვე შეცვალა  იგორ კოჩიევმა.

ჟენევის თანათავმჯდომარემ ევროკავშირიდან, ტაივო კლაარმა არჩილ ტატუნაშვილის საკითხი წამოჭრა.

“ვიცით, რომ სერიოზული ინციდენტი მოხდა, რომელმაც გავლენა იქონია სამშვიდობო მოლაპარაკებაზე და სავარაუდოდ, ჟენევის დისკუსიებზეც იმოქმედებს, თუ ამას ჩვენ არ გადავწყვეტთ“, - განაცხადა კლაარმა.

საქართველოს საპატრიარქოს ინფორმაციით, არჩილ ტატუნაშვილის ცხედარს ოჯახს, სავარაუდოდ, დღეს ან ხვალ დაუბრუნებენ.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. 

ოკუპირებული ახალგორის გამგებელმა, ფილიპ ხაჩიროვმა განაცხადა, რომ არანაირი კონფლიქტი არ ჰქონია არჩილ ტატუნაშვილთან და მის გარდაცვალებასთან კავშირი არ აქვს.

სამოქალაქო მოძრაობის "ძალა ერთობაშია“ ხელმძღვანელმა დავით ქაცარავამ განაცხადა, რომ მისი ინფორმაციით, ტატუნაშვილის მკვლელობის დამკვეთი ოკუპირებული ახალგორის გამგებელი ფილიპ ხაჩიროვია, შემსრულებელი კი დეფაქტო ცხინვალის მილიციის წარმომადგენელი ლუდვიგ ხაჩიროვი.

ტატუნაშვილთან ერთად დაკავებული ორი მოქალაქე - ლევან ქუტაშვილი და იოსებ პავლიაშვილი - ცხინვალის ციხიდან გაათავისუფლეს, თუმცა ჯერ კიდევ ოკუპირებულ ტერიტორიაზე არიან. ახალგორის გამგებელმა, ნუგზარ თინიკაშვილმა თქვა, რომ მათ ოკუპირებული ტერიტორიის დატოვების უფლებას არ აძლევენ, არ უბრუნებენ პირადობის მოწმობებსა და “საშვებს.”