საქართველო და ევროკავშირი მეცნიერების საკითხებში თანამშრომლობას გააძლიერებენ

საქართველოს პრეზიდენტი დღეს ევროკომისარს კვლევების, მეცნიერების და ინოვაციების საკითხებში კარლოს მოედაშს შეხვდა. ინფორმაციას პრეზიდენტის ადმინისტრაცია ავრცელებს.

შეხვედრაზე გიორგი მარგველაშვილმა ხაზი გაუსვა ძალიან პოზიტიურ და აქტიურ თანამშრომლობას საქართველოს ხელისუფლებასა და კომისიას შორის განსაკუთრებით კვლევებისა და ინოვაციების სფეროში და იმედი გამოთქვა, რომ ეს კავშირები კიდევ უფრო გაღრმავდება.

საქართველოს პრეზიდენტმა ევროკომისარი თბილისში ვიზიტით მოიწვია. შეხვედრაზე ასევე ხაზი გაესვა დინამიკურ პროგრესს ევროკავშირისა და საქართველოს ურთიერთობებში და იმ შედეგებს, რომლის მიღებაც ქვეყანამ შეძლო და მომავალშიც აპირებს, მიიღოს ასოცირების შეთანხმების გაფორმების, ენერგეტიკულ გაერთიანებაში გაწევრიანებისა და უვიზო მიმოსვლის დაწესების შემდეგ.

გიორგი მარგველაშვილის განცხადებით, საქართველოს ინტერესია, ქვეყანამ გამოიყენოს ყველა შესაძლებლობა, რათა ევროკავშირის სტანდარტებს, ნორმებს და საუკეთესო პრაქტიკას შეესაბამაბოდეს ისეთ სფეროებში, როგორებიცაა ენერგეტიკა, ტრანსპორტი და კომუნიკაცია, სოფლის მეურნეობა, გარემოს დაცვა, კულტურა, მეცნიერება და ინოვაციები. ხაზი გაესვა იმას, რომ მეცნიერება და ინოვაციები საქართველოს საშინაო დღისწესრიგის ერთ-ერთი პრიორიტეტია.

ბრიუსელში გიორგი მარგველაშვილის სამუშაო ვიზიტი დღეს დაიწყო და 10 მარტს დასრულდება.