ხორავას ქუჩაზე მოკლული დავით სარალიძის მამა გამოძიებას უნდობლობას უცხადებს

ხორავას ქუჩაზე მოკლული დავით სარალიძის მამა გამოძიებას უნდობლობას უცხადებს.

ტელეკომპანია „მაესტროსთან“ ზაზა სარალიძემ განაცხადა, რომ საქმეში ძალიან ბევრი დამნაშავეა, რომელიც მიმალულია. მისი მტკიცებით, მოზარდებმა ჩვენება შეცვალეს და სასამართლოზე რადიკალურად განსხვავებული დეტალები გააჟღერეს.

ზაზა სარალიძე არ გამორიცხავს, რომ გამოძიება შესაძლოა სხვა დამნაშავეებს ხელს აფარებდეს. 

„სიმართლეს არ ლაპარაკობენ, რაც ადრე ჰქონდათ ნათქვამი ეჭვქვეშ აყენებენ. ბავშვები ამბობენ,არ მახსოვს, დაბნეული ვიყავი და ახლა აღვიდგინე და ახლა ვსაუბრობ სიმართლესო. იტყუებიან ბავშვები ასე რომ ვთქვათ, კი მართალია რა ჩვენებებსაც აძლევენ პროკურორები და ადვოკატები ამბობენ იმას, რომ ეს არის დაზუსტება, იმ ჩვენებების რაც მისცეს პოლიციაში. მაშინ პოლიციაში რატო მოიტყუეს? თუ ახლა სიმართლეს ამბობენ, მაშინ პოლიციაში მოიტყუეს. ვიღაცამ ასწავლა მათ ეს ყველაფერი, ან  ვიღაცამ მართლა მოისყიდა ან ვიღაცამ სერიოზულად დააშინა. ჩემი აზრით ვიღაცამ ასწავლა რომ ასე უნდა ილაპარაკონ და ლაპარაკობენ ასე, იმიტომ რომ არასრულწლოვნები არიან და შეუძლიათ ჩვენება შეცვალონ სასამართლოში“ - ამბობს მოკლული სარალიძის მამა.

პარალელურად ზაზა სარალიძე პროკურატურაში განაცხადის შეტანას გეგმავს. მიზეზი ბორის კაკუბავას განცხადებებია, რომელიც მან ხორავას ქუჩაზე მომხდარი სისხლიანი გარჩევის საკითხზე გააკეთა. 

„მე პროკურატურაში ვაპირებ განცხადების შეტანას, რომ გამოძიება დაიწყოს ბორის კაკუბავას სიტყვებზე, რომელმაც პირდაპირ დაადანაშაულა ჩემი შვილი და ლევანი, რომ მის შვილიშვილს აშანტაჟებდნენ თურმე და ფულს სძალავდნენ.“

ზაზა სარალიძის ეჭვებს ბრალდების მხარის მიერ დანიშნული ექსპერტიზის შედეგის გაჭიანურებაც იწვევს. 

გასული წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე მოზარდი 2 დეკემბერს გარდაიცვალა. 

შინაგან საქმეთა სამინისტროს ინფორმაციით, ხორავას ქუჩის ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ აღკვეთის ღონისძიების სახით პატიმრობა შეუფარდა.

საქმის გამოძიებასთან დაკავშირებით ბრალდებულთა ოჯახებს შეკითხვები აქვთ. კეთდება განცხადებები, რომ ხორავას ქუჩის სისხლიან გარჩევაში სხვა დამნაშავეებიც იკვეთებიან. სწორედ მათ გამოაშკარავებას და დასჯას ითხოვს ერთ-ერთი ბრალდებული არასრულწლოვნის დედა, რომელმაც "ქრონიკასთან" ორთვიანი დუმილი დაარღვია.

ხორავას ქუჩაზე მოკლული მოზარდების საქმის არსებითი განხილვა სასამართლოში 22 იანვარს დაიწყო. კანონით, საქმეზე, რომელშიც ბრალდებულებიც არასწრულწლოვნები არიან, განაჩენი 6 თვის ვადაში, ივნისამდე უნდა გამოცხადდეს.