51-ე სკოლის მოსწავლეების მკვლელობაზე კიდევ ერთი თვითმხილველის ჩვენება ვრცელდება

ტელეკომპანია “მაესტროს“ მიერ ექსკლუზიურად მოპოვებული მორიგი ჩვენება,  51-ე სკოლის უმცროსკლასელს ეკუთვნის. საქმის პირდაპირი მოწმე ჩვენებაში ყვება, როგორ დაიწყო კონფლიქტი სკოლის საპირფარეშოში და რატომ გაგრძელდა მოგვიანებით ხორავას ქუჩაზე. ჩვენება, რომელიც არასრულწლოვანმა საქმის გამომძიებელს მისცა პირველი დეკემბრით თარიღდება.

ჩვენებაში იმ არასრულწლოვანზეც არის საუბარი ვინც დღეს სასამართლოზე მოწმის სტატუსით დაიკითხა, რომელიც როგორც მონაყოლიდან ირკვევა საპირფარეშოს ინციდენტში აქტიურად მონაწილეობდა. 

“ვიდექით ზურგით, იარაღიდან ესროლეს ა. ს.-ს, ამასთან ერთად ა. ს.-ც მიტრიალდა და მათ უთხრა, რას შვებით რაებს აკეთებთო და დ.-ს დაუწყო კამათი, უძაბავდა, რა დროსაც იქვე მყოფმა დ. ღ.-მ „პადრუჩკი“ გაუკეთა, ერთი წუთი რას ბლატაობ წამომყევიო და გაიყვანა გარეთ დერეფნისკენ, რის შემდეგაც მე გარეთ გამიყვანა დ.ნ.-მ -მითხრა წამო რას ბლატაობ, იქეთ ვისაუბროთ აქ პრობლემები შემქმნებაო, რაზედაც მე ვუთხარი ,რომ გარეთ რომ ვისაუბროთ იქ არ შეგექმნება პრობლემები მეთქი, რის შემდგომაც მაინც გავყევი და ავედით მეორე სართულზე სადაც დაძაბული ტონით დავუწყეთ ერთმანეთში საუბარი“, - წერია ჩვენებაში. 

თვითმხილველის თქმით, ინციდენტის შესახებ ინფორმაციას ფლობდა მანდატური, რომელმაც მალევე აღნიშნული სკოლის სასწავლო ნაწილს, თინიკო ყენიას შეატყობინა.

“ის მექაჩებოდა. ამ დროს დაძაბულ საუბარზე მოვიდა მანდატური , რომელმაც გვითხრა, რომ დაწყნარდით და დაბლა ჩადითო, ჩვენც დავმშვიდდით და ჩავედით დაბლა სადაც პირველ სართულზე, დერეფანში დავინახე რომ ერთად იყვნენ დ. ღ. ჩემი ძმაკაცი ა.ს. და მათთან ერთად იყო ასევე დ.ნ. -ის კლასელი დ. ს. ამის შემდგომ, როდესაც დამთავრდა მესამე გაკვეთილი, ჩემთან მოვიდა მანდატური და მითხრა, რომ სასწავლო ნაწილს თინიკო ყენიას სურდა ჩემთან საუბარი, რის გამოც წავყევი  მას. როდესაც ავედი ქალბატონ თინიკოსთან მკითხა, თუ რა მოხდა.  მე ვუთხარი რომ არაფერი, უბრალოდ, საუბარი მქონდა ერთ პიროვნებასთან და დავამთავრეთ ყველაფერი მეთქი, მან მითხრა, რომ ვიცი ვისთანაც გქონდა კამათი - კამერები ვნახეო, აღნიშნულზე მე ვუპასუხე, რომ თუ კი იცით, მასთან მქონდა უბრალოდ საუბარი და ყველაფერი დამთავრდა მეთქი, მე სახელი არ მიხსენებია“, ნათქვამია ჩვენებაში.

ამ ინფორმაციას კატეგორიულად უარყოფს 51-ე სკოლის დირექტორი მანანა თურქაძე, რომელიც ამტკიცებს, რომ ფაქტის დაფიქსირების შემთხვევაში, სკოლის დირექცია რეაგირებას მოახდენდა.

ამავე არასრულწლოვნის ჩვენებაში კიდევ ერთი, ინცინდენტში შესაძლო მონაწილის არსებობა იკვეთება, რომელიც გამოძიების მასალებში არ ფიგურირებს.  

“ჩხუბის დროს გავიგონე ხმა, დაიჭრაო, ვინ დაიძახა ვერ ვიხსენებ, აღნიშნულ შეძახილზე გავიხედე და დავინახე, რომ ვიღაც ჩემთვის უცნობ ბიჭს, რომელიც იყო გამხდარი, ეცვა შავი ფერის კაპიშონიანი ზედატანი, ასევე დაბალი თმები ჰქონდა, ხელები ჰქონდა სისხლიანი, მაგარამ ეს არი იყო მ.კ.-ის  მეგობარი, რომელიც ზემოთ ვახსენე, ანუ რომელმაც დაიწყო დ.ს.-თან  ჩხუბი. მეც და სხვებსაც შეგვეშინდა, თან ვიღაც ყვიროდა გაიქეცითო და მე გამოვვარდი გარეთ. კითხვაზე გიპასუხებთ, რომ მე ვიცნობდი ლ.დ.-ს , რომელიც მე ზემოაღნიშნული ჩხუბის დროს არ მინახავს, ასევე კითხვაზე გიპასუხებთ , რომ მე დ.ს. უკვე დაჭრილი არ დამინახავს, მე დ.ს. დავინახე ჩხუბის დროს , რომელიც იდგა  მოჩხუბრებს შორის შუაში და დავიმახსოვრე მისი დიდი აღნაგობის გამო“, წერს თვითმხილველი.

ვინ იყო გამხდარი ე.წ კაპიშონიან  შავ ზედატანში ჩაცმული არასრულწლოვანი, თუ ის ორი ბრალდებულიდან არცერთი არ იყო, ჯერ უცნობია. თუმცა ჩვენების მოხედვით ის მოკლულ დავით სალარიძეს არ უპირისპირდებოდა. იმის მიუხედავად რომ მოწმეთა ჩვენებებში ბევრი სხვა მოზარდი იკვეთება საქმის პროკურორი ბრალდებულთა წრის გაზრდას გამორიცხავს. 

სისხლიანი გარჩევის საქმეზე მორიგი სხდომის დასრულების შემდეგ დაცვის მხარე კვლავ ამტკიცებს რომ საქმის მოწმეები ჩვენებებს ცვლიან, პროკურორი კი განმარტავს, რომ მოწმეები ჩვენებებს მხოლოდ აზუსტებენ.

გასული წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე მოზარდი 2 დეკემბერს გარდაიცვალა. 

შინაგან საქმეთა სამინისტროს ინფორმაციით, ხორავას ქუჩის ინციდენტის გამო 2001 წელს დაბადებული პირი განზრახ მკვლელობის ბრალდებით 2 დეკემბერს დააკავეს. მანამდე, პროკურატურამ ამ დანაშაულისთვის ორი პირი პასუხისგებაში მისცა. 4 დეკემბერს კი, სასამართლომ მათ აღკვეთის ღონისძიების სახით პატიმრობა შეუფარდა.

საქმის გამოძიებასთან დაკავშირებით ბრალდებულთა ოჯახებს შეკითხვები აქვთ. კეთდება განცხადებები, რომ ხორავას ქუჩის სისხლიან გარჩევაში სხვა დამნაშავეებიც იკვეთებიან. სწორედ მათ გამოაშკარავებას და დასჯას ითხოვს ერთ-ერთი ბრალდებული არასრულწლოვნის დედა, რომელმაც "ქრონიკასთან" ორთვიანი დუმილი დაარღვია.

ხორავას ქუჩაზე მოკლული მოზარდების საქმის არსებითი განხილვა სასამართლოში 22 იანვარს დაიწყო. კანონით, საქმეზე, რომელშიც ბრალდებულებიც არასწრულწლოვნები არიან, განაჩენი 6 თვის ვადაში, ივნისამდე უნდა გამოცხადდეს.