ევროკავშირის სადამკვირვებლო მისია ტატუნაშვილის ცხედრის გადმოცემაზე განცხადებას ავრცელებს

ევროკავშირის სადამკვირვებლო მისია არჩილ ტატუნაშვილის ცხედრის გადმოცემის ფაქტს სპეციალური განცხადებით ეხმაურება, სადაც ის მხარეებს ერგნეთის შეხვედრების განახლებისკენ მოუწოდებს. განცხადება ორგანიზაციის ვებგვერდზე ქვეყნდება.

„ევროკავშირის სადამკვირვებლო მისია მიესალმება იმ ფაქტს, რომ არჩილ ტატუნაშვილის ცხედარი, საბოლოოდ, გადაეცა ოჯახს.

გასულ კვირებში, ამ ტრაგიკული საქმის ფარგლებში მისია ცხელი ხაზის მეშვეობით დიალოგის ხელშეწყობაში მონაწილეობდა.

ევროკავშირის სადამკვირვებლო მისია, მისი შესაძლებლობებისა და მანდატის გათვალისწინებით, ყურადღებით აკვირდება მოვლენებს.

მისია ადასტურებს მზადყოფნას, მხარი დაუჭიროს მიმდინარე გამოძიებებს და ხელი შეუწყოს დისკუსიებს ინციდენტების პრევენციისა და მათზე რეაგირების მექანიზმის, ასევე მისიის ცხელი ხაზის ფარგლებში.

მისია მოუწოდებს მონაწილეებს, განაახლონ შეხვედრები ერგნეთში, რომლებიც მისიისა და ეუთოს ხელშეწყობით ტარდება“, - ნათქვამია განცხადებაში.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, ოკუპირებული ცხინვალის ინფორმაციით, ის სუნთქვის უკმარისობით გარდაიცვალა. ქართულ მხარეს ცხინვალის ვერსიის არ სჯერა და მიაჩნია, რომ არჩილ ტატუნაშვილი მოკლეს. 

არჩილ ტატუნაშვილის დაღუპვას საერთაშორისო დონეზე დიდი გამოხმაურება მოჰყვა. 

საქართველოს პარლამენტში ევროპულ საქართველოსა და უმრავლესობას შორის ოკუპირებულ ტერიტორიებზე საქართველოს მოქალაქეების დაღუპვასა და ადამიანის უფლებების დარღვევასთან დაკავშირებით რეზოლუციის პროექტიც დარეგისტრირდა. დეპუტატები რეზოლუციას მიმდინარე სასესიო კვირაში დაამტკიცებენ.

ტატუნაშვილის ცხედარი ქართული მხარის მიერ კონტროლირებად ტერიტორიაზე 20 მარტს გადმოასვენეს. ამ  წუთებში მას ლევან სამხარაულის სახელობის ექსპერტიზის ბიუროში ექსპერტიზა უტარდება.