კობახიძემ საპარლამენტთაშორისო კავშირის ასამბლეაზე რუსეთის ოკუპაციაზე ილაპარაკა

ჟენევაში ვიზიტის ფარგლებში ირაკლი კობახიძემ საპარლამენტთაშორისო კავშირის (IPU) რიგით 138-ე ასამბლეის მონაწილეებს სიტყვით მიმართა.

ფორუმის მთავარი თემაა: "გლობალური რეჟიმის გაძლიერება მიგრანტებისა და ლტოლვილებისთვის: საფუძვლიანი პოლიტიკური გადაწყვეტილებების საჭიროება.“ პარლამენტის თავმჯდომარემ ამ გამოწვევაზე ილაპარაკა.

კერძოდ, კობახიძემ ამ მიმართულებით საქართველოს ეროვნული სტრატეგია და ასევე საქართველოს ხედვა მიგრაციისა და ლტოლვილთა საკითხების უფრო ეფექტური მართვის შესახებ წარმოადგინა.

"25 წლის განმავლობაში, საქართველო მუდმივად იდგა იმ 280,000 იძულებით გადაადგილებულ პირთა საცხოვრებლით უზრუნველყოფის უზარმაზარი პრობლემების წინაშე, რომლებიც გამოიხიზნენ საქართველოს კოფლიქტური რეგიონებიდან - აფხაზეთიდან და ცხინვალიდან, ე. წ. სამხრეთ ოსეთიდან. ქართველთა და სხვა ეროვნების ადამიანთა პირველი ტალღა მასობრივად იქნა გამოძევებული ეთნიკური წმენდის შედეგად მას შემდეგ, რაც საქართველოს მთავრობამ დაკარგა კონტროლი საკუთარ ტერიტორიებზე 1990-იანი წლების დასაწყისში. ეს ტერიტორიები უკანონოდ და ძალისმიერად იქნა ოკუპირებული რუსეთის ფედერაციის მიერ სამხედრო აგრესიის შედეგად სუვერენული საქართველოს წინააღმდეგ 2008 წელს, რამაც გამოიწვია იძულებით გადაადგილებულ პირთა და ლტოლვილთა რაოდენობის საგრძნობლად გაზრდა, და იმავდროულად, კიდევ უფრო გააუარესა ჰუმანიტარული და ადამიანის უფლებების მდრომარეობა ოკუპირებულ ტერიტორიებზე"- განაცხადა კობახიძემ.

პარლამენტის თავჯდომარემ არჩილ ტატუნაშვილზეც ისაუბრა.

"დღესდღეობით, რუსეთს ოკუპირებული აქვს საქართველოს ტერიტორიის 20%; არაკანონიერად ჰყა​ვს განთავსებული შეიარაღებული ძალები ოკუპირებული ტერიტორიებზე; ხელს უწყობს საოკუპაციო რეჟიმის შენარჩუნებას აფხაზეთსა და ცხინვალის რეგიონში; და ამ საოკუპაციო რეჟიმის დახმარებით გამუდმებით არღვევს ადამიანის უფლებებს – იტაცებს და აწამებს მშვიდობიან მოსახლეობას. უახლესი შემთხვევა იყო არჩილ ტატუნაშვილის გატაცება, რომელიც დაკავებული იყო ცხინვალში და გარდაიცვალა წამების შედეგად, ზღუდავს თავისუფლად გადაადგილების უფლებას ადგილობრივი მოსახლეობისათვის და ამ რეგიონებიდან იძულებით გადაადგილებულ პირთათვის, ართმევს ბავშვებს მშობლიურ ქართულ ენაზე განათლების მიღების უფლებას“,- განაცხადა კობახიძემ.

ამასთან, მისივე თქმით, რუსული შეიარაღებული ძალები ატარებენ ე.წ. ბორდერიზაციის პოლიტიკას.

„აღმართავენ მავთულხლართებს, რომლებიც არა მხოლოდ თავისუფლად გადაადგილებას ზღუდავას, არამედ იწვევს სამწუხაროდ არაკანონიერად ჰყოფს შუაზე სოფლებს და ზოგჯერ ოჯახებსაც კი. სხვა სიტყვებით რომ ვთქვათ, იძულებით გადაადგილებული პირებიცა და ის მოსახლეობაც, რომელიც ჯერ კიდევ ცხოვრობს ოკუპირებულ ტერიტორიებზე თავის გადარჩენისა და ძირითადი კეთილდღეობის უდიდესი გამოწვევის წინაშე დგანან. აღნიშნული სიტუაცია გადაულახავ დაბრკოლებას უქმნის იძულებით გადაადგილებულ პირთა და ლტოლვილთა სახლებში დაბრუნებას, და წარმოშობს იძულებით გადაადგილებულ პირთა ახალი ტალღის საფრთხეს"- განაცხადა კობახიძემ.

საპარლამენტთაშორისო კავშირი (IPU) საერთაშორისო საპარლამენტო დიალოგის ცენტრია, რომელიც პარლამენტებს შორის კონტაქტების დამყარებასა და კოორდინაციას, გამოცდილების გაზიარებას, საერთო გამოწვევებზე მსჯელობას და შესაბამისი ნაბიჯების გადადგმას უწყობს ხელს. მისი ერთ-ერთი მთავარი მიზანია, თავდაცვისა და ადამიანის უფლებების ხელშეწყობა, რაც საპარლამენტო დემოკრატიისა და განვითარების არსებითი ფაქტორია. ღონისძიების მუშაობაში 140-მდე ქვეყნის 800-მდე პარლამენტის წევრი, მათ შორის 65 სპიკერი იღებს მონაწილეობას.