მდინარაძე: ნარკოპოლიტიკის კანონმდებლობაზე მუშაობა ერთი დღითაც არ შეწყვეტილა

ნარკოპოლიტიკის კანონმდებლობის თემაზე მუშაობა ერთი დღითაც არ შეწყვეტილა-ამის შესახებ საპარლამენტო ფრაქცია „ქართული ოცნების“ თავმჯდომარემ, მამუკა მდინარაძემ განაცხადა. ინფორმაციას 1tv-ი ავრცელებს.

მდინარაძემ კომენტარი გააკეთა მედიის წარმომადგენლების მიმართვაზე, სადაც მიმართვის ავტორები პარლამენტისგან ნარკოპოლიტიკის ლიბერალიზაციის პროცესის დაჩქარებას ითხოვენ.

„მინდა, დაგარწმუნოთ, რომ არც ერთი დღე არ შეწყვეტილა მუშაობა და შეხვედრები. ვხვდებით სხვადასხვა ჯგუფებს. იცით, რომ რადიკალურად განსხვავებული მოსაზრებები არსებობს ამ თემაზე, მათ შორის საპარლამენტო უმრავლესობაშიც. ჩვენც გვაქვს პოზიციები დასაახლოებელი – კერძოდ, კანონმდებლობა ერთი მხრივ უნდა უზრუნველყოფდეს ლიბერალურ მიდგომას ნარკომომხარებლებთან და, მეორე მხრივ უნდა ვიყოთ მკაცრები გამსაღებლებთან. ეს არის ძალიან დიდი გამოწვევა“, – აღნიშნა მამუკა მდინარაძემ.

მდინარაძემ იმედი გამოთქვა, რომ ინტენსიური მუშაობის შედეგად მოხერხდება ნარკომომხმარებლებთან და ნარკოგამსაღებლებთან მიმართებაში მიდგომების გამიჯვნა.

„დიფერენციაცია უნდა გაკეთდეს მომხმარებლებსა და გამსაღებლებს შორის. საბოლოო ჯამში, ამ ინტენსიური მუშაობის შედეგად ძალიან მალე მივალთ იქამდე, რომ ეს გამიჯვნა და ნარკოპოლიტიკის შემუშავებაც მოხდება სწორად“,- განაცხადა მამუკა მდინარაძემ.

5 მარტს ნარკოპოლიტიკის კანონპროექტის განხილვა კიდევ 2 თვით გადავადდა.

პარლამენტის ჯანდაცვის კომიტეტმა ნარკოტიკების მოხმარების დეკრიმინალიზაციის საკანონმდებლო ინიციატივას პრინციპების დონეზე მხარი გასული წლის 27 დეკემბერს დაუჭირა. თუმცა მას შემდეგ კანონპროექტის განხილვა რამდენჯერმე გადაიდო. ცნობილია, რომ უმრავლესობის ნაწილი ნარკოპოლიტიკის კანონპროექტის მხარდაჭერას არ აპირებს. 

2017 წლის 26 ივლისს პარლამენტმა მესამე მოსმენით განიხილა და მხარი დაუჭირა საკანონმდებლო პაკეტს, რომლითაც მარიხუანასა და მცენარე კანაფთან დაკავშირებით კანონის ლიბერალიზაცია იგეგმება. 2017 წლის 29 ივლისს მარიხუანის მცირე ოდენობით მოხმარებისთვის პატიმრობის გაუქმებაზე ნორმა ძალაში შევიდა.