თბილისის მერია გენგეგმაზე გადაწყვეტილების მიღებას 2 აპრილს აპირებს

"ორშაბათს ვაპირებთ, მივიღოთ გადაწყვეტილება გენგეგმასთან დაკავშირებით - ის, თუ როგორი იქნება ეს გადაწყვეტილება, ამას საზოგადოება მედიის მეშვეობით გაიგებს, - ამის შესახებ თბილისის მერმა კახა კალაძემ პარლამენტში გამართული შეხვედრის დასრულების შემდეგ განაცხადა, სადაც “ქართული ოცნების“ დეპუტატებთან ერთად, “სითი ინსტიტუტის“ მიერ მომზადებული თბილისის მიწათსარგებლობის გენერალური გეგმის პროექტი განიხილეს. ინფორმაციას სააგენტო "ინტერპრესნიუსი" ავრცელებს.

კალაძის ინფორმაციით, მერიის წარმომადგენლებმა შეხვედრის მონაწილეებს ის შენიშვნები გააცნეს, რომელიც დოკუმენტთან დაკავშირებით მერიას გააჩნია და მათ მიერ დანახულ ხარვეზებზე ისაუბრეს. 

“გადაწყვეტილება მისაღებია დედაქალაქის მერიის მხრიდან. უბრალოდ ვალდებული ვართ, ყველას გავაცნოთ დოკუმენტთან დაკავშირებით არსებული მდგომარეობა. “სითი ინსტიტუტსაც“ აქვს ვალდებულება საჯარო შეხვედრები გამართოს. ვიცი, რომ ისინი პარასკევს მართავენ შეხვედრას და მერიის მხრიდან აუცილებლად დავესწრებით. უახლოეს დღეებში იქნება ცნობილი, რა გადაწყვეტილებას მივიღებთ. გენგეგმის მიღება-არ მიღებით პასუხისმგებლობას იღებს დედაქალაქის მერია. მერიას 5 ეტაპი მიღებული აქვს. საკმაოდ მასშტაბური მასალაა, მოცულობითია. მე-6 ეტაპი, რომელიც ყველაზე მნიშვნელოვანია და შეიძლება ითქვას, რომ ეს არის საბოლოო გენგეგმა, არის ხარვეზები ამ მიმართულებით. მიუხედავად იმისა, რომ ჩვენი მხრიდან მიცემული იყო ყველანაირი შესაძლებლობა და ყველანაირი ვადა იმისა, რომ გამოესწორებინათ, დღესაც არსებობს ხარვეზები“, - განაცხადა კალაძემ შეხვედრის დასრულების შემდეგ. 

თბილისის გენგეგმის შესახებ პარლამენტში მსჯელობდენ. პროექტი თბილისის მერმა კახა კალაძემ საკრებულოსა და პარლამენტის მაჟორიტარ დეპუტატებს გააცნო , თუმცა შეხვედრას არც ოპოზიცია და არც გეგმის შემდეგი "სითი ინსტიტუტი საქართველო" არ ესწრებოდა. 

27 მარტს გენგეგმა ოპოზიციის წარმომადგენლებსა და დაინტერესებულ პირებს სასტუმრო "ბილტმორში" გააცნეს. შეხვედრა ხმაურისა და სიტვყიერი დაპირისპირების ფონზე წარიმართა.

თბილისის განვითარების გენერალური გეგმის პროექტი, რომელიც 2030 წლამდეა გაწერილი, თბილისის მერიას 3 იანვარს ჩაჰბარდა.

გენგეგმაზე მუშაობა 2015 წელს დაიწყო და დოკუმენტის შესაქმნელად 2 800 000 ლარი გამოიყო. მიწათსარგებლობის გენერალური გეგმის 5 ეტაპი უკვე მიღებული და დამტკიცებულია, მე-6 საბოლოო ეტაპზე მერიამ ჯგუფი ერთი და იმავე შენიშვნის სამჯერ გაუთვალისწინებლობისთვის გასული წლის დეკემბერში 140 ათასი ლარით დააჯარიმა და შენიშვნების გამოსასწორებლად 45-დღიანი ვადა მისცა, რომელიც თებერვლის ბოლოს ამოიწურა.