რა დარღვევები აღმოჩნდა მინდელის შახტაში 2017 წელს

შრომის პირობების ინსპექტირების დეპარტამენტმა „საქნახშირის“ კუთვნილ მინდელისა და ძიძიგურის სახელობის ქვანახშირის შახტები და სამუშაო ადგილებზე პირობების დაცვის კუთხით არსებული მდგომარეობა ორჯერ, 2016 წელსა და 2017 წელს შეამოწმა.

გამოვლენილი დარღვევებისა და გაცემული რეკომენდაციების ანალიზიდან ჩანს, რომ საწარმოში უსაფრთხოებისა და დასაქმებულთა შრომის პირობების დაცვის კუთხით პრობლემები სისტემურია.

ინსპექტირების დეპარტამენტის აცემულ ანგარიშში ვკითხულობთ, რომ დასაქმებულები ღირსებისათვის შემლახავ სამუშაო გარემოში იყვნენ.

ინსპექტირების მასალების მიხედვით, საწარმოს სხვა უბნებთან შედარებით, განსაკუთრებით მძიმე მდგომარეობაა მინდელისა და ძიძიგურის სახელობის შახტებში.

2017 წელს ძიძიგურის და მინდელის სახელობის შახტები გამოვლენილი მძიმე დარღვევები:

ვაგონების სამუხრუჭედ გამოიყენება ფიცრის ნაჭრები;

გალში (ადამიანების ასაწევი და ჩასაყვანი მოწყობილობა) არ არსებობს სამანქანო განყოფილებასთან კავშირის საშუალებები;

შახტის გვირაბებში შეინიშნება ჭერის დაზიანება, რაც საფრთხეს უქმნის დასაქმებულებს;

ადამიანების სიმაღლიდან ვარდნის ადგილები არ არის შემოღობილი და დაცული სასკიპე ჭაურის სამანქანო კამერაში;

ქვესადგურში დასაქმებულები არ არიან უზრუნველყოფილი შესაბამისი დიალექტრიკული საშუალებებით (ჩაფხუტი, ბოტი, ხელთათმანი, ხალიჩა);

შახტაში არსებული მაღალი ძაბვის ქვესადგური დაუცველია გარეშე პირთა შეღწევისგან, არ არის განათება ერთ მხარეს არსებული კარი ღიაა, ხოლო მეორე მხარე კარის გარეშეა.

შახტაში დარღვეულია ღია ცეცხლის გამოყენების წესი;

ჩამყრელ ბუნკერებთან დასაქმებულებს, არ აქვთ ინდივიდუალური დაცვის საშუალებები (სათვალე და რესპირატორი).

მინდელის შახტში ტრაგედია 5 აპრილს, დილით, დაახლოებით 4 საათზე მოხდა. შედეგად 6 მუშა დაიღუპა, 3 კი დაშავდა. მომხდარზე გამოძიება დაიწყო. 

მომხდარის გამო, 6 აპრილი საქართველოში გლოვის დღედ გამოცხადდა.

რაც შეეხება სტატისტიკას, 2018 წლის გასულ სამ თვეში საწარმოო უბედური შემთხვევების შედეგად, (სხვადასხვა სფეროებში), ქვეყნის მასშტაბით, სამუშაო ადგილზე დაიღუპა 18 ადამიანი და მძიმედ დაშავდა 12.