ნიკა მაჭუტაძე ოპონენტებს: „ ... მივიღებთ პრუწუნ-პრუწუნს“

მოძრაობა „სახელმწიფო ხალხისთვის“ ლიდერი ნიკოლოზ მაჭუტაძე, რომელიც 28 აპრილს ამსტერდამში მიხეილ სააკაშვილთან შეხვედრის მონაწილეა, „იმედის“ გადაცემაში „პირისპირ“ საკუთარ ოპონენტებს, რომლებიც მიიჩნევენ, რომ ბურჭულაძის ყოფილი პარტია ნაციონალებს მიეყიდა, „პოეტურად“ გამოეხმაურა და გალაქტიონ ტაბიძის გამონათქვამს მიმართა.

„მე მახსენდება ასეთი ფუნაგორია, გალაქტიონის მიერ ნათქვამი. როდესაც მას დაუწერეს რაღაც მორიგი კრიტიკა ბოლშევიკური შეკვეთით სოციალისტური რეალიზმის პოზიციებიდან, გალაქტიონმა იმ ცნობილ პროზაიკოსს ასეთი პასუხი გასცა: „ამ ჩვენს საცოდავ პროზას, თუ გამოვაკლებთ „ოზას“ და მივუმატებთ „უწუნს“, მივიღებთ „პრუწუნ-პრუწუნს“. აი ასეთივე ბრალდებებია ეს“, - თქვა მაჭუტაძემ. ზოგადად კი ოპოზიციური ძალების ამსტერდამში სააკაშვილთან ჩასვლა 1921 წლის შემდეგ ნოე ჟორდანიასთან ანტიბოლშევიკების ჩასვლას შეადარა, რომელთა შორის მასთან დაპირისპირებულიც იყვნენ.

რამდენიმე ოპოზიციური პარტიის ლიდერი 28 აპრილს ამსტერდამში საქართველოს ყოფილ პრეზიდენტს შეხვდა. სააკაშვილის სერობაზე მონაწილეები საპრეზიდენტო არჩევნებზე ერთიანი კანდიდატის წარდგენაზე შეთანხმდნენ.

საქართველოში საპრეზიდენტო არჩევნები 2018 წლის ოქტომბერში გაიმართება.

ოპერის მომღერალმა პაატა ბურჭულაძემ 2015 წლის ნოემბერში დააფუძნა ორგანიზაცია "საქართველოს განვითარების ფონდი", რომლის დეკლარირებული მიზანი იყო "ქვეყნისთვის აქტუალური საკითხების განხილვა და სახელმწიფოებრივად მოაზროვნე დემოკრატიული ძალების კონსოლიდაცია". 2016 წლის საპარლამენტო არჩევნების წინ მან პოლიტიკური მოძრაობა "სახელმწიფო ხალხისთვის" შექმნა, თუმცა მისმა მოძრაობამ საარჩევნო ბარიერი ვერ გადალახა, რის შემდეგაც ოპერის მომღერალმა ჯერ პარტია, შემდეგ კი საქართველო დატოვა. 9 სექტემბერს ის რუსეთში მიხაილოვსკის თეატრის სამხატვრო ხელმძღვანელად დაინიშნა.