მეტროს თანამშრომლების მხოლოდ ერთი ნაწილისთვის ხელფასის ზრდა არ განიხილება

თბილისის სატრანსპორტო კომპანიის ხელმძღვანელის, მამუკა კობახიძის განცხადებით კომპანია მეტროს მემანქანეების მოთხოვნებთან დაკავშირებით მუშაობს. როგორც მამუკა კობახიძემ აღნიშნა, კომპანია, ვერ გაითვალისწინებს ანაზღაურების მატების ერთ მიმართულებას, რადგან სხვა თანამშრომლებში სამართლიან უკმაყოფილებას გამოიწვევს. ინფორმაციას 1 tv ავრცელებს.

„კომპანიაში დასაქმებულია 6300 ადამიანი და მათი შრომითი პირობების გაუმჯობესება კომპანიისთვის ერთ-ერთ პრიორიტეტულ ნაბიჯს წარმოადგენს. ვმუშაობთ პრობლემის მოგვარებაზე“, აცხადებს კობახიძე და განმარტავს, რომ კომპანიაში ყოველი 5-6 თვის განმავლობაშია ამზდებენ მემანქანეებს, ასევე კონდუქტორებს დამხმარე თანამშრომლების სახით, რაც ერთგვარი რესურსია რეზერვისთვის.

ამასთან, სატრანსპორტო კომპანიის ხელმძღვანელი აცხადებს, რომ ყველა მემანქანე, ვინც ხელფასის გაზრდას ითხოვს, არ არის პროფკავშირის წევრი.

„რაც შეეხება იმას, რომ 240-ვე მემანქანეა გაწევრიანებული პროფკავშირში და 240-ვეს მოთხოვნაა ხელფასების მატება, შემიძლია გითხრათ, რომ 240-ვე არ არის ამ პროფკავშირში და ყველას მოთხოვნა არ არის გაფიცვა”,- განმარტავს კობახიძე.

მეტროპოლიტენის მემანქანეების ნაწილი 3 მაისს გაფიცვას გეგმავს.  თბილისის მეტროპოლიტენის მემანქანეები საათობრივი ანაზღაურების გაზრდას 2 აპრილიდან ითხოვენ.