თბილისის 15 ქუჩას დამოუკიდებლობის დეკლარაციაზე ხელმომწერთა სახელები დაერქმევა

თბილისში მდებარე 15 ქუჩას, საქართველოს დამოუკიდებლობის 100 წლის იუბილესთან დაკავშირებით, სახელწოდებები შეეცვლება. ეს ის ქუჩებია, რომლებიც აქამდე საბჭოთა ოკუპაციასთან ასოცირებული ადამიანების სახელებს ატარებენ. ინფორმაციას სააგენტო "ინტერპრესნიუსი" ავრცელებს.

ამ ქუჩებს საქართველოს დამოუკიდებლობის დეკლარაციაზე ხელმომწერ საზოგადო მოღვაწეთა სახელები დაერქმევა.

"ეს ქუჩები თბილისის სხვადასხვა რაიონში მდებარეობს. მაგალითად, ჩუღურეთში გვაქვს „ცხრა ძმის“ ქუჩა და მოედანი, რომელთაც „რევოლუციონერი ძმადნაფიცების“ სახელი ჰქვიათ. მოსახლეობას დღემდე ჰგონია, რომ ისინი „ცხრა ძმა ხერხეულიძის“ ქუჩაზე ცხოვრობენ. ამიტომ, ჩვენ ამ ქუჩას „ცხრა ძმა ხერხეულიძის“ სახელს მივანიჭებთ. კრწანისის რაიონში კი გვაქვს „მირ ვეზიროვის ქუჩა“, რომელიც აზერბაიჯანელი რევოლუციონერი იყო. ასევე, კრწანისის რაიონში არსებობს რევოლუციონერის სერგო სურგულაძის ქუჩა. საბჭოთა ოკუპაციასთან ასოცირებული, ამ ეტაპზე 15 ქუჩაა მოძიებული. ყველა მათგანს სახელი შეეცვლება. მათ დამოუკიდებლობის დეკლარაციაზე ხელმომწერ საზოგადო მოღვაწეთა სახელები დაერქმევათ", - თქვა თბილისის საკრებულოს სახელდებისა და სიმბოლიკის კომისიის თავმჯდომარემ თინათინ ნიბლოშვილმა.

კერძოდ, ამჟამად არსებულ „მირ ვეზიროვის ქუჩას“ ნიკოლოზ ჩხეიძის სახელი მიენიჭება, რომელიც 1918 წელს დამოუკიდებელი საქართველოს პარლამენტის, ხოლო 1919 წელს დამფუძნებელი კრების თავმჯდომარე იყო. სერგო სურგულაძის ქუჩას კი ევგენი გეგეჭკორის სახელი დაერქმევა (1918-21 წლებში საგარეო საქმეთა და იუსტიციის მინისტრის პოსტებს იკავებდა). 

შეგახსენებთ, რომ თბილისში ვარდების მოედნისთვისაც იგეგმება სახელწოდების შეცვლა.