დიმიტრი ლორთქიფანიძე ნარკორეალიზატორების სიკვდილით დასჯის მომხრეა

პარლამენტის ყოფილი წევრი დიმიტრი ლორთქიფანიძე ნარკოპოლიტიკისა და ამ მხრივ ქვეყანაში ბოლო დღეების განმავლობაში განვითარებულ მოვლენებს Facebook-ზე ეხმიანება.

დიმიტრი ლორთქიფანიძის მოსაზრებით, ნარკოდანაშაულთან დაკავშირებით დღეს არსებული სისხლის სამართლებრივი ნორმები "ვერ უზრუნველყოფს საჯარო-სახელმწიფოებრივ ინტერესს და მოცემული დანაშაულის კრეფსით გათვალისწინებული სტატისტიკა ამის პირდაპირი მტკიცებულებაა."

დიმიტრი ლორთქიფანიძე მიიჩნევს, რომ შექმნილი მდგომარეობიდან გამომდინარე, ნარკორეალიზატორები და გამსაღებლები სიკვდილით უნდა დაისაჯნონ.

"ყოველივე ზემოაღნიშნულიდან გამომდინარე, ნარკოდანაშაულის ზრდის სწრაფი ტემპისა და ნარკოტიკული საშუალებების უკანონო გასაღების დახვეწილი ტექნოლოგიების არსებული სურათის გათვალისწინებით, რასაც ეწირება ადამიანთა სიცოცხლე და დეგრადირების საფრთხე ემუქრება მომავალ თაობებს, ხომ არ გვეფიქრა საგანგებო ზომების გატარებაზე იმ ორგანიზებული დანაშაულის წევრ პირთა მიმართ , რომლებიც ეწევიან ნარკოტიკების კონტრაბანდას, დამზადება -წარმოებას და გასაღებას!!! სიკვდილით მოვაჭრეს - სიკვდილი!!!", - წერს დიმიტრი ლორთქიფანიძე Facebook-ზე.

ბოლო დღეებში, საქართველოში ალაპარაკდნენ ახალი ნარკოტიკის შესახებ, რომელმაც, არსებული ინფორმაციით, უკვე რამდენიმე ადამიანის, მათ შორის ახალგაზრდების სიცოცხლე იმსხვერპლა.

შეგახსენებთ, რომ ინტერნეტის გამოყენებით, ნარკოტიკული ნივთიერების გასაღების ბრალდებით ორი პირის დაკავების შესახებ შსს-მ 8 მაისს განაცხადა. ჯერჯერობით უცნობია, ყიდდნენ თუ არა ეს ადამიანები იმ ნარკოტიკსაც, რომლის გამოც თბილისში ახალგაზრდები დაიღუპნენ.