პრემიერი: ნარკომოვაჭრეებთან სახელმწიფო შეუვალი იქნება, მომხმარებლებთან კი ჰუმანური

პრემიერმინისტრმა გიორგი კვირიკაშვილმა საქართველოში ნარკოტიკებთან დაკავშირებით ბოლო პერიოდში მიმდინარე მოვლენებზე აღნიშნა, რომ ამ მიმართულებით სახელმწიფო "ძალიან მტკიცე და შეუვალი იქნება". პრემიერმა ნარკოტიკებთან ბრძოლის წინააღმდეგ შსს-ს ბრძოლა დადებითად შეაფასა. ამასთან გიორგი კვირიკაშვილი ჯერჯერობით დაუდგენელი ნარკოტიკული საშუალებებით ახალგაზრდების დაღუპვასაც გამოეხმაურა.

"მინდა ყველამ იცოდეს, სახელმწიფო იქნება ძალიან მტკიცე და შეუვალი ნარკოტრაფიკის, ნარკოტიკების რეალიზატორებთან მიმართებაში. მინდა მადლობა გადავუხადო შს მინისტრს და მის გუნდს გაწეული სამუშაოსთვის.

ასევე მინდა ვთქვა, რომ სამწუხაროდ ეს უბედური შემთხვევები ადამიანებმა ახალი ნარკოკანონმდებლობის მიღებასთან დააკავშირეს, ეს აბსოლუტურად არანაირ კავშირში არ არის ამასთან. მე მინდა ასევე გითხრათ, იუსტიციის სამინისტროს ბაზაზე მუშაობს უწყებათაშორისო ჯგუფები, სადაც ჩართულები არიან მთავრობის, პარლამენტის, არასამთავრობო ორგანიზაციების წრმომადგენლები. 

რა თქმა უნდა, ერთის მხრივ, მომხმარებლების, იმ ადამიანების მიმართ, რომლებსაც ეს უბედურება და სენი სჭირთ, სახელმწიფო უნდა იყოს უფრო ჰუმანური, მაგრამ, მეორეს მხრივ, სახელმწიფო უნდა იყოს მტკიცე რეალიზატორებთან მიმართებაში, და ჩვენ აბსოლუტურად მკაფიო გზავნილი უნდა გავუგზავნოთ ნარკორეალიზატორებს , რომ ვერასდროს შევეგუებით ამას.

მინდა მოვუწოდო ყველა ახალგაზრდას, ყველას ვისაც ეს საბედისწერო ნაბიჯი არ გადაუდგამს, ცხოვრება მშვენიერია და უამრავი საინტერესო რამ არსებობს. შემეცნების უამრავი განზომილება არსებობს, და მაინცდამაინც ამ განზომილებას ნუ დაეწაფებით, ეს არის მომაკვდინებელი სენი, რომელზეც ადამიანებმა უნდა თქვან უარი, ჯანსაღი ცხოვრების წესი, განათლება, შემეცნება, აქტიური ჩართულობა, სახელმწიფოს ცხოვრებაში ეს არის ის, რასაც უნდა ეწაფებოდეს ახალგაზრდა, და გთხოვთ, ჩვენს მომავალ თაობას", - განაცხადა პრემიერმა.

გიორგი კვირიკაშვილმა ყველას მოუწოდა, და განსაკუთრებით საზოგადოებრივი აზრის ლიდერებს, რომ დაიწყონ და ჩაერთონ ფართო კამპანიაში ნარკოტიკების წინააღმდეგ.