პარლამენტი ნარკოპოლიტიკის კანონპროექტს, სავარაუდოდ, 21-23 სექტემბერს განიხილავს

დეკრიმინალიზაციის შესახებ კანონპროექტის კენჭისყრა პარლამენტში 21-23 სექტემბერს იგეგმება. ამის შესახებ ჯანდაცვის კომიტეტის თავმჯდომარემ აკაკი ზოიძემ თქვა. ინფორმაციას "ლიბერალი" ავრცელებს.

ზოიძის თქმით, ბოლო პერიოდში მთავრობის რეორგანიზებისა და სხვა გარკვეული მოვლენების გამო, ამ თემამ გუნდის შიგნით აქტუალობა დაკარგა, თუმცა ზოიძის თქმით, ეს ნიშნავს იმას, რომ ხელისუფლება მას არ დაასრულებს.

"ხელმძღვანელობისგან პირობა მაქვს მიღებული, რომ სექტემბრის პირველ-ორ კვირაში გვექნება სესია და აუცილებლად მივიღებთ [ცვლილებებს], სანამ გავალთ წინასაარჩევნო არდადეგებზე“, - ამის შესახებ ზოიძემ გადაცემა „თავისუფალი ბაზარი ვახო მეგრელიშვილთან“ სტუმრობისას განაცხადა.

„ვგეგმავთ, რომ 21-23-ში  გაიმართება შემდეგი პლენარული სხდომა ქუთაისში. მანამდე უნდა გაიმართოს იურიდიულ კომიტეტში მოსმენა, ასეთია გეგმა ჯერჯერობით, მაგრამ დაბეჯითებით ვერ გეუბნებით, იმიტომ რომ იმდენჯერ ვთქვით... ყოველ შემთხვევაში გეგმა ასეთია“, - ამბობს ზოიძე.

საქართველოს პარლამენტში ნარკოპოლიტიკის ლიბერალიზაცია მსჯელობა რამდენჯერმე გადაიდო. ამ საკითხზე ქართულ ოცნებაში აზრთასხვადასხვაობაა. 4 ივნისს, ნარკოპოლიტიკის ლიბერალიზაციაზე მსჯელობა მას შემდეგ განახლდა, რაც მანამდე ორჯერ რამდენიმე კვირით გადაიდო. 14 მაისს პარლამენტის თავმჯდომარემ განაცხადა, რომ პარლამენტი ნარკოპოლიტიკის კანონპროექტს, ივნისის ბოლომდე დაამტკიცებდა.

30 ივლისს საკონსტიტუციო სასამართლომ პარტია "გირჩის" წევრების სარჩელი დააკმაყოფილა და მარიხუანის მოხმარებისთვის ადმინისტრაციული სასჯელი გააუქმა. თუმცა არსებობს გარკვეული გამონაკლისები. თუ მოქალაქე კანაფს საზოგადოებრივი თავშეყრის ადგილებში, სასწავლო-სააღმზრდელო დაწესებულებებში მოწევს, ან მისი მოხმარება საფრთხეს შეუქმნის სხვა ადამიანს, მოქალაქე დაჯარიმდება.