კონტრაქციის მონაწილის თქმით, ისინი შს მინისტრს შეხვდნენ

კონტრაქციის ერთ-ერთ მონაწილის თქმით, ისინი შს მინისტრს გიორგი გახარიას შეხვდნენ, სადაც შეთანხმდნენ, რომ აქციის მონაწილეები პირველი გიმნაზიის ტერიტორიას დატოვებენ და 9 აპრილის ბაღში გადაინაცვლებენ. ამის მიუხედავად, კონტრაქციის მონაწილეები, ჯერჯერობით, სკოლასთან არიან. ამის შესახებ ინფორმაციას "ლიბერალი" ავრცელებს.

კონტრაქციის მონაწილემ გამოცემას ასევე უთხრა, რომ შს მინისტრის თქმით, პარლამენტის წინ მთავარი აქციაც საათნახევარში დაიშლება (საუბარია თეთრი ხმაურის მიერ ორგანიზებულ აქციაზე).

შეგახსენებთ, რომ შინაგან საქმეთა მინისტრი გიორგი გახარია თეთრი ხმაურის მოძრაობასთან შესახვედრად მივიდა, რომლის ორგანიზებითაც მეორე დღეა პარლამენტის შენობის წინ საპროტესტო აქცია იმართება. შეხვედრა უკვე საათზე მეტია მიმდინარეობს.

"იმედის კვირის" წყაროს ინფორმაციით, შეხვედრას შს მინისტრთან ერთად, პარლამენტის თავმჯდომარე ირაკლი კობახიძე და თბილისის მერი კახა კალაძეც ესწრებიან.

პარლამენტთან ორი აქცია მიმდინარეობს, რომლებზეც სიტუაცია რამდენჯერმე დაიძაბა. ერთის ორგანიზატორი თეთრი ხმაურის მოძრაობაა, რომელიც ღამის კლუბებში სპეცოპერაციას აპროტესტებს. მეორე მხარეს კი თხმ-ის კონტრაქცია იმართება, რომელთა მხარდამჭერებიც მოძრაობის წევრების წინააღმდეგ ძალის გამოყენებით იმუქრებიან, თუ ტერიტორიას არ დატოვებენ. ამასთან, კონტრაქციის რამდენიმე მონაწილე პოლიციელებისთვის წინააღმდეგობის გაწევის გამო დააკავეს.

11 მაისის ღამეს შსს-მ თბილისის ღამის კლუბებში სპეცოპერაცია ჩაატარა და 8 ნარკორეალიზატორი დააკავა. კლუბებში „ბასიანსა" და „გალერიში" ჩატარებული სპეცოპერაცია პარლამენტის შენობის წინ გააპროტესტეს. დღეს აქციის მეორე დღეა. 

ბოლო პერიოდში, საქართველოში ალაპარაკდნენ ახალი ნარკოტიკის შესახებ, რომელმაც, არსებული ინფორმაციით, უკვე რამდენიმე ადამიანის, მათ შორის ახალგაზრდების სიცოცხლე იმსხვერპლა.